ইউৰোপ-আমেৰিকাক প্ৰত্যাহ্বান! ৰাছিয়াৰ পৰা খাৰুৱা তেল আমদানিৰ বাবে চুক্তি আইঅ’চিএলৰ

ডিজিটেল ডেস্ক : ৰাছিয়াৰ ইউক্ৰেইনৰ যুদ্ধক লৈ প্ৰায় সমগ্ৰ বিশ্বই ৰাছিয়াক একাষৰীয়া কৰাৰ চেষ্টা কৰি আহিছে যদিও বন্ধু ৰাষ্ট্ৰ ভাৰতে এইক্ষেত্ৰত কৌশলী স্থিতি গ্ৰহণ কৰিছে। ভাৰতে আনকি বিভিন্ন পদক্ষেপেৰে পশ্চিমীয়া শক্তিসমূহৰ বিপৰীতে অৱস্থান গ্ৰহণ কৰা দেখা গৈছে। ইউৰোপীয় ইউনিয়ন তথা আমেৰিকাই ৰাছিয়াৰ ওপৰত বিভিন্ন বাধা-নিষেধ আৰোপ কৰি তেওঁলোকক অৰ্থনৈতিকভাৱে কোঙা কৰা চেষ্টা চলাই থকাৰ মাজতে ভাৰতৰ স্থিতি এতিয়াও নমনীয় হৈ আছে। শেহতীয়াকৈ ভাৰতে গ্ৰহণ কৰা এটা পদক্ষেপে পুনৰ ইউৰোপৰ সিদ্ধান্তৰ বিপৰীত স্থিতি লোৱা দেখা গৈছে। ইণ্ডিয়ান অইন কৰ্প’ৰেচন লিমিটেডে তেল আমদানিৰ বাবে ৰুছ কোম্পানী এটাৰ সৈতে চুক্তি স্বাক্ষৰ কৰিছে। ৰুছ কোম্পানীটোৰ পৰা ৩ নিযুত বেৰেল খাৰুৱা তেল আমদানি কৰাৰ বাবে চুক্তি স্বাক্ষৰ কৰিছে আইঅ’চিএল-এ। এয়া এটা কোম্পানীৰ সৈতে আন এটা কোম্পানীয়ে কৰা চুক্তি বুলি প্ৰকাশ কৰিছে এটা সূত্ৰই। ইউক্ৰেইনৰ বিৰুদ্ধে সামৰিক অভিযান চলাই থকাত পশ্চিমীয়া দেশসমূহে ৰাছিয়াৰ তৈলক্ষেত্ৰৰ ওপৰত বিভিন্ন প্ৰতিবন্ধকতা আৰোপ কৰা তথা তেল আমদানি বন্ধ কৰাৰ কথা ঘোষণা কৰাৰ মাজতে ভাৰতৰ সৰ্ববৃহৎ তেল কোম্পানীটোৰ এই পদক্ষেপ তাৎপৰ্যপূৰ্ণ বিবেচিত হৈছে। আমেৰিকা-ইউৰোপে বাধা আৰোপ কৰিলেও ৰাছিয়াৰ তেল কোম্পানীবোৰৰ পৰা খাৰুৱা তেল ক্ৰয় কৰাৰ বাবে ভাৰতীয় তেল কোম্পানীবোৰৰ ওপৰত কোনো প্ৰতিবন্ধকতা নাই। ইফালে, ভাৰতৰ ইন্ধনৰ প্ৰয়োজনীয়তা পূৰণৰ বাবে ইয়াৰ লেনদেনক লৈ ৰাজনীতি কৰিব নালাগে বুলি কালি এটা চৰকাৰী সূত্ৰই প্ৰকাশ কৰিছিল।