ডিজিটেল ডেস্ক:অলপতে কফি উইথ কৰণত দেখা গৈছিল বলিউডৰ তাৰকা জাহ্নৱী কাপুৰক। এই অনুষ্ঠানতেই মডেল ৰাহুল খান্নাৰ বিষয়ে কিছু আমোদজনক মন্তব্য কৰিছিল জাহ্নৱীয়ে৷ কৰণৰ প্ৰশ্নত জাহ্নৱীয়ে স্বীকাৰ কৰিবলৈ বাধ্য হৈছিল যে তেওঁ কিছুদিনৰ পৰা চ’চিয়েল মিডিয়াত অভিনেতা তথা মডেল ৰাহুল খান্নাক অনুসৰণ কৰি আছে৷ ৰাহুল খান্নাক আকৰ্ষণীয় আৰু হট বুলিও মন্তব্য কৰে জাহ্নৱীয়ে ৷
জাহ্নৱীৰ এই প্ৰশংসা সম্পৰ্কে এতিয়া মুখ খুলিছে ৰাহুল খান্নাই। ৰাহুলে জাহ্নৱীক মৰমলগা আৰু আত্মবিশ্বাসী বুলি মন্তব্য কৰে৷ সেই অনুষ্ঠানটো চোৱা নাছিল যদিও সকলোতে চৰ্চিত হোৱাত এই বিষয়ে জানিব পাৰিছিল ৰাহুল খান্নাই৷ জাহ্নৱীৰ মুখত এনে প্ৰশংসা শুনিবলৈ পায় যথেষ্ট সুখী হৈ পৰিছে ৰাহুল৷
জাহ্নৱীক আগতে নাপালেও জাহ্নৱীৰ পিতৃ বনী কাপুৰক ভালদৰে জানো বুলিও কয় ৰাহুলে৷ নিজ পিতৃ বিনোদ খান্নাৰ সৈতে অভিনয় কৰি থকাৰ সময়ত বহুবাৰ জাহ্নৱীৰ মাতৃ শ্ৰীদেৱীক লগ পাইছিল ৰাহুলে৷ জাহ্নৱীৰ আত্মবিশ্বাসৰ বাবে স্বৰ্গীয় মাতৃ শ্ৰীদেৱীয়ে হয়তো জাহ্নৱীক লৈ সদায় গৌৰৱ কৰে বুলিও কয় ৰাহুলে৷
বৰ্তমান জাহ্নৱী ডিজনী হটষ্টাৰত মুক্তি পাব লগীয়া “গুড লাক জেৰী” নামৰ ছবিখনৰ প্ৰচাৰত ব্যস্ত। উল্লেখ যোগ্য যে এই ছবিখনত জাহ্নৱীয়ে জেৰীৰ চৰিত্ৰত অভিনয় কৰিছে৷
Continue Reading
