'জীনা ইচি কা নাম হে'! এসময়ৰ কলেজৰ ইংৰাজী প্ৰৱক্তাই এতিয়া হাঁহি হাঁহি চলায় অটো

ডিজিটেল ডেস্কঃ জীৱন যাত্ৰাত আমি বহু মানুহ লগ পাওঁ। কিছুমান মানুহে আমাৰ মনত সাঁচ বহুৱাই থৈ যায়। নিকিতা আয়াৰ নামৰ এগৰাকী যুৱতীৱে ছ'চিয়েল মিডিয়াত লিখিছিল এগৰাকী অটো চালকৰ কাহিনী। বেংগালুৰুৰ সেই কাহিনী এতিয়া ভাইৰেল হৈ পৰিছে। অফিচলৈ যাবলৈ অটোখনত উঠিছিল নিকিতা। নিকিতাৰ সৈতে খুব সুন্দৰ ইংৰাজী ভাষাত বাৰ্তালাপ কৰে অটো চালকগৰাকীয়ে। তেওঁৰ মুখত ইমান সাৱলীল ইংৰাজী ভাষা শুনি আচৰিত হৈ পৰিছিল নিকিতা। কৌতূহলী হৈ নিকিতাই তেওঁক সুধিছিল যে কেনেকৈ ইংৰাজী ভাষাত তেওঁৰ ইমান দখল আছে? সেই যাত্ৰাৰ সময় আছিল ৪৫ মিনিট। ৪৫ মিনিটৰ যাত্ৰাত অটো চালকগৰাকীৰ ইংৰাজী শুনি মন্ত্ৰমুগ্ধ হৈ পৰে যুৱতীগৰাকী। অটো চালকগৰাকীৰ নাম পতাবী ৰমণ। তেওঁৰ বয়স ৭৪। পতাবী ৰমণে কৈছিল যে তেওঁ মুম্বাইৰ এখন মহাবিদ্যালয়ৰ ইংৰাজী প্ৰবক্তা আছিল আৰু তেওঁ এমএ আৰু এমএড কৰিছিল। তেওঁ আনকি নিকিতা আয়াৰক কৈছিল যে "এতিয়া আপুনি মোক নিশ্চয় সুধিব যে মই কিয় অটো চলাই আছো?" পতাবী ৰমণে কয় যে তেওঁ ১৪ বছৰ ধৰি অটো চলাই আছে। যেতিয়াৰ পৰা তেওঁ মহাবিদ্যালয়ৰ প্ৰবক্তা হিচাপে অৱসৰ লৈছিল তেতিয়াৰে পৰা তেওঁ অটো চলাবলৈ লয়। পতাবী ৰমণে প্ৰকাশ কৰিছিল যে তেওঁ মুম্বাইত প্ৰবক্তা হিচাপে কাম কৰিছিল কাৰণ তেওঁ কৰ্ণাটকত কোনো চাকৰি বিচাৰি পোৱা নাছিল। কৰ্ণাটকৰ মহাবিদ্যালয়সমূহত চাকৰি নাপাই অতিষ্ঠ হৈ তেওঁ মুম্বাইলৈ যায় য'ত তেওঁ এখন প্ৰতিষ্ঠিত মহাবিদ্যালয়ত চাকৰি পাইছিল। তেওঁ ৬০ বছৰ বয়সত অৱসৰ লোৱাৰ পাছত কৰ্ণাটকৰ বেংগালুৰুলৈ ঘূৰি আহিছিল। তেওঁ কাম কৰা মহাবিদ্যালয়খন ব্যক্তিগত আছিল, সেয়েহে তেওঁ পেঞ্চন নাপায়। অটোৰিক্সা চলাই পতাবী ৰমণে দিনে কমেও ৭০০-১৫০০/- লাভ কৰে যিটো তেওঁ আৰু তেওঁৰ পত্নীৰ বাবে পৰ্যাপ্ত। হাঁহি হাঁহি নিকিতা আয়াৰক এই কথা কৈছিল পতাবী ৰমণে। অটো চালকজনে আৰু প্ৰকাশ কৰিছিল যে তেওঁলোকৰ এজন পুত্ৰ আছে। তেওঁ কৈছিল যে আমি আমাৰ সন্তানৰ ওপৰত নিৰ্ভৰশীল নহয়। তেওঁলোকে তেওঁলোকৰ জীৱন যাপন কৰে আৰু আমি আমাৰ জীৱন সুখেৰে যাপন কৰিছো। পতাবী ৰমণে কৈছিল "বৰ্তমান মই মোৰ ৰাস্তাৰ ৰাজা, মই যিকোনো সময়তে মোৰ অটোখন বাহিৰলৈ উলিয়াব পাৰো আৰু যেতিয়াই বিচাৰো কাম কৰিব পাৰো।" নিকিতা আয়াৰে পতাবী ৰমণৰ বাবে কেইটামান প্ৰশংসাৰ শব্দ লিখি তেওঁৰ পোষ্টটো সমাপ্ত কৰিছিল। নিকিতাই লিখিছিল- "জীৱন সম্পৰ্কে এটাও অভিযোগ নাই। একো অনুশোচনা নাই। এই লুকাই থকা নায়কসকলৰ পৰা বহুত শিকিবলৈ বাকী আছে। মোৰ পুৱাটো আজি বিশেষ হৈ পৰিল।" আৰু পঢ়কঃ ইউপিএছচি টপাৰ টিনা ডাবীৰ দ্বিতীয় বিবাহ! জীৱনসংগী কোন?