ডিজিটেল ডেস্কঃ সন্ত্ৰাসবাদীক ধনৰ যোগান ধৰাৰ অভিযোগত অভিযুক্ত কাশ্মীৰৰ বিচ্ছিন্নতাবাদী নেতা য়াছিন মালিকক বুধবাৰে দিল্লীৰ আদালতে যাৱজ্জীৱন কাৰাদণ্ডৰ শাস্তি প্ৰদান কৰে। লগতে মালিকক ১০ লাখ টকাৰ জৰিমনা বিহিছে ন্যায়ালয়ে। তিহাৰ কাৰাগাৰত য়াছিন মালিকক কটকটীয়া নিৰাপত্তাৰ অধীনত ৰখাৰ ব্যৱস্থা কৰিছে তিহাৰ কাৰাগাৰ প্ৰশাসনে।
ইয়াছিন মালিকক তিহাৰ কাৰাগাৰৰ ৭ নম্বৰ বেৰেকত ৰখা হৈছিল আৰু এতিয়া তেওঁ তাতেই থাকিব। শাস্তি ঘোষণাৰ আগৰে পৰাই কাশ্মীৰত বিৰাজ কৰে এক চেপা উত্তেজনাই। হাজাৰ-বিজাৰ নিৰাপত্তা বাহিনীৰ জোৱানে সমগ্ৰ কাশ্মীৰতে কটকটীয়া নিৰাপত্তা বেহু গঢ়ি তোলে। মালিকক মৃত্যুদণ্ড বিহাৰ বাবে নিয়াৰ অধিবক্তাই আবেদন জনাইছিল যদিও আদালতে তেওঁক যাৱজ্জীৱন কাৰাদণ্ডৰ শাস্তি বিহে।
য়াছিন মালিকৰ বিৰুদ্ধে ভাৰতীয় দণ্ডবিধিৰ ধাৰা ১৬ (সন্ত্ৰাসবাদী কাৰ্য), ১৭, (সন্ত্ৰাসবাদী কাৰ্যৰ বাবে পুঁজি যোগান), ১৮ (সন্ত্ৰাসবাদী কাৰ্য সংঘটিত কৰাৰ ষড়যন্ত্ৰ), আৰু ২০ (সন্ত্ৰাসবাদীৰ সদস্য হোৱা)ধাৰা আৰোপ কৰা হৈছিল। একেদৰে তেওঁৰ বিৰুদ্ধে ইউ.এ.পি.এ. ৰ ধাৰা ১২০,১২৪-ক (ৰাজদ্ৰোহ) আৰোপ কৰা হৈছে। মালিকৰ বিৰুদ্ধে সন্ত্ৰাসবাদী সংগঠন লস্কৰ-ই-তৈবা,হিজবুল-মুজাহিদীন জম্মু আৰু কাশ্মীৰ লিবাৰেচন ফ্ৰণ্ট (জেকেএলএফ) আৰু জৈছ-ই-মহম্মদ (জেইএম) ক সহায় কৰাৰ গুৰুতৰ অভিযোগ উত্থাপন হৈছে। উল্লেখ্য যে য়াছিন মালিকৰ শাস্তি ঘোষণা কৰাৰ পাছতেই বিষম পৰিস্থিতিৰ আশংকা কৰি শ্ৰীনগৰত ইণ্টাৰনেট সেৱা বন্ধ কৰি দিয়া হয়।
Continue Reading
