জনসাধাৰণ বাদ, বিকি-কেটৰ বিয়া পাত; তৎ নাই ৰাজস্থান প্ৰশাসনৰ গাত...

ডিজিটেল ডেস্ক: হৈ গ’লেই ৰক্ষা! নিজৰ পুত্ৰ-জীৰ বিয়াক লৈ সাধাৰণ পৰিয়াল এটাৰ এনেকুৱাই চিন্তা। পিছে বিয়াকেন্দ্ৰিক এই চিন্তাই এইবাৰ টোপনি হৰিছে এখন ৰাজ্যৰ প্ৰশাসনৰ। বিয়াও এলা-পেছা নহয়, বিকি-কেটৰ বিয়া। হট কাপলৰ হটেষ্ট বিয়া। লাগিব পানী নসৰকা সুৰক্ষা।

বলীউডত এতিয়া চিনেমাতকৈয়ো যেন অধিক চৰ্চিত বিকি কৌশল আৰু কেটৰিণা কাঈফৰ বিয়াৰ কথা। সংবাদমাধ্যমৰ পৰা আঁতৰি ফুৰা বিকি-কেটে সংগোপনে পাতিব বিচাৰিছে বিয়া। ৰাজস্থানৰ ছাৱাই মাধোপুৰ জিলাৰ ছিক্স ছেনছেছ ফ’ৰ্ট বাৰৱাৰাত অনুষ্ঠিত হ’বলগীয়া বিয়াখনৰ সুৰক্ষাক লৈ ভীষণ ব্যস্ত জিলা প্ৰশাসন। বিশেষ বিয়াখনৰ সুৰক্ষাৰ বাবে বৈঠকৰ আহ্বান কৰিছে জিলা প্ৰশাসনে। সংবাদমাধ্যমত প্ৰকাশিত তথ্য অনুসৰি জিলা প্ৰশাসনে এখন জৰুৰী বৈঠকৰ আহ্বান কৰে। বৈঠকখনত হাইপ্ৰফাইল বিয়াখনত জনসমাগম নিয়ন্ত্ৰণ তথা আইন-শৃংখলাৰ বিষয়ে আলোচনা কৰা হয়। জিলাখনৰ অতিৰিক্ত উপায়ুক্ত সুৰয সিং নেগিয়ে জাৰি কৰা জাননী অনুসৰি আলোচনাচক্ৰত জিলা উপায়ুক্ত, আৰক্ষী অধীক্ষক, হোটেলৰ প্ৰতিনিধিসকল আৰু ফ’ৰেষ্ট ৰেঞ্জাৰসকল মিলিত হ'ব।

তথ্য অনুসৰি জনসমাগম আৰু সংবাদ মাধ্যমৰ পৰা আঁতৰি বলীউড যুটিটোৱে হেলিকপ্টাৰেৰে হোটেললৈ যাব। বিবাহৰ দৃশ্য সংগ্ৰহ কৰিবলৈ কোনো সংবাদ মাধ্যমে ড্ৰোন ব্যৱহাৰ কৰিলে হোটেলৰ সুৰক্ষাকৰ্মীয়ে সেইবোৰ ধ্বংস কৰিব বুলিও কথা ওলাইছে। আনহাতে, ডিচেম্বৰ মাহৰ ৯ তাৰিখে আনুষ্ঠানিক বিবাহ হ'বলগীয়া বিকি কৌশল আৰু কেটৰিণা কাঈফে আজি ক’ৰ্ট মেৰেজ কৰিব বুলিও এক তথ্য প্ৰকাশ পাইছে।