ডিজিটেল ডেস্কঃ উপাধ্যক্ষৰ নিৰ্বাচন আৰু নেট বিষয়ক লৈ এন ডি এ চৰকাৰ তথা বিৰোধী ইণ্ডিয়া এলায়েন্সৰ মাজত সংঘৰ্ষ অব্যাহত আছে। এনে সময়তে কংগ্ৰেছৰ প্ৰাক্তন সভানেত্ৰী তথা ৰাজ্যসভাৰ সাংসদ ছোনিয়া গান্ধীয়ে প্ৰধানমন্ত্ৰী নৰেন্দ্ৰ মোদীক সমালোচনা কৰিছে। ছোনিয়াৰ মতেযদিও মোদীয়ে সকলোৰে সহমতৰ কথা কয়, তথাপি তেওঁ প্ৰকৃততে সংঘাতক গুৰুত্ব দিয়ে।
সৰ্বভাৰতীয় সংবাদ মাধ্যমৰ সৈতে হোৱা এক সাক্ষাৎকাৰত প্ৰবীণ নেত্ৰীগৰাকীয়ে কয় যে, প্ৰধানমন্ত্ৰীয়ে যেন একো নঘটাৰ দৰে নিৰুদ্বেগ হৈ কাম কৰিছে। তেওঁ সকলোৰে লগত মিলি যাবলৈ পৰামৰ্শ দিয়ে। কিন্তু আচলতে তেওঁ সংঘাতক গুৰুত্ব দিয়ে।
উপাধ্যক্ষৰ নিৰ্বাচন সন্দৰ্ভত ছোনিয়া গান্ধীৰ মন্তব্য, "যদি পৰম্পৰা মানি লোৱা হয়, তেন্তে উপাধ্যক্ষৰ পদ বিৰোধীৰ কোনোবা এজনক দিব লাগে। এয়া এটা অতি ন্যায্য দাবী। কিন্তু চৰকাৰে এই দাবী নাকচ কৰিলে। সপ্তদশ লোকসভাতো উপাধ্যক্ষ পদত কাকো নিযুক্তি দিয়া হোৱা নাছিল।” ইফালে, নেট বিতৰ্ক সন্দৰ্ভত ছোনিয়াৰ বক্তব্য, " পৰীক্ষা পে চৰ্চা অনুষ্ঠিত কৰা প্ৰধানমন্ত্ৰীগৰাকীয়ে প্ৰশ্নকাকত ফাদিল হোৱাৰ ক্ষেত্ৰত সম্পূৰ্ণ নিমাত।"
ইয়াৰ উপৰিও বিজেপিয়ে জৰুৰীকালীন বিষয়টো উত্থাপন কৰি কংগ্ৰেছক যিদৰে আক্ৰমণ অব্যাহত ৰাখিছে তাক সমালোচনা কৰে ছোনিয়াই। তেওঁৰ মতে, প্ৰধানমন্ত্ৰীয়ে সংবিধানৰ ওপৰত হোৱা আক্ৰমণৰ পৰা দৃষ্টি আকৰ্ষণ কৰিবলৈ বিষয়টো টানি আনিছে। আনকি অধ্যক্ষয়ো বিষয়টোক ‘আচৰিত’ বুলি কোৱা সন্দৰ্ভত ছোনিয়া গান্ধীয়ে কয় যে অধ্যক্ষৰ স্থিতি হৈছে কোনো ৰাজনৈতিক পক্ষ নোলোৱাকৈ কঠোৰ নিৰপেক্ষতা বজাই ৰখা।
Continue Reading
