‘কা’ বিৰোধী আগাথা, মুকুল মমতাৰ দললৈ যোৱাৰ পাছত সলনি মেঘালয়ৰ ৰাজনীতি

ডিজিটেল ডেস্কঃ নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে বিতৰ্কিত তিনিওখন কৃষি আইন বাতিল কৰাৰ পাছত অসমতো পুনৰ ‘কা’ বিৰোধী আন্দোলনে মূৰ দাঙি উঠিছে৷ কিছুদিনৰ আগতে শিৱসাগৰৰ বিধায়ক অখিল গগৈয়ে অসমত পুনৰ বিস্তৃত ৰূপত ‘কা আন্দোলন’ গঢ়ি তুলিব লাগে ৰাইজলৈ এক আহ্বান জনাইছিল৷ অসমৰ চুবুৰীয়া ৰাজ্যকেইখনৰ লগতে সকলো জনজাতীয় ৰাজ্যই পূৰ্বৰে পৰাই ‘কা’বিৰোধিতা কৰি আহিছে৷ শেহতীয়াকৈ মেঘালয়ৰ মুখ্যমন্ত্ৰী কনৰাড চাংমা ভগ্নী আগাথা চাংমাই ‘কা’ বিৰোধিতা কৰিছে৷

ভাৰতীয় জনতা পাৰ্টীৰ সহযোগী দল নেচনেল পিপলছ পাৰ্টীৰ নেতা আগাথা চাংমাই সৰ্বদলীয় বৈঠকত নাগৰিকত্ব (সংশোধনী) আইন বাতিল কৰিবলৈ দাবী জনায়, বিতৰ্কিত এই আইনখন তেওঁ আগন্তুক সংসদৰ শীতকালীন অধিৱেশনতে বাতিল কৰিবলৈ দাবী জনাইছে৷ মেঘালয়ৰ তুৰাৰ সাংসদ আগাথা চাংমাই নেচনেল ডেমক্ৰেটিক এলায়েন্সৰ অংশীদাৰসকলৰ সভাত ‘কা’ বাতিল কৰিবলৈও দাবী জনায়। এই বৈঠকত উপস্থিত আছিল ভাৰতৰ প্ৰতিৰক্ষা মন্ত্ৰী ৰাজনাথ সিং আৰু কেন্দ্ৰীয় মন্ত্ৰী প্ৰলহাদ যোশী আৰু পীয়ুষ গোৱেল।

আগাথাই লগতে কয় যে, কৃষি আইন বাতিল কৰাৰ দৰে যেনেদৰে কৃষিজীৱী জনসাধাৰণৰ আৱেগক প্ৰাধান্য দিয়া হৈছিল, একেদৰে উত্তৰ-পূবৰ জনসাধাৰণৰ আৱেগৰ কথা মনত ৰাখি কেন্দ্ৰক ‘কা’ বাতিল কৰিবলৈ সাংসদগৰাকীয়ে অনুৰোধ জনাইছে৷ উল্লেখ্য যে, নেচনেল পিপলছ পাৰ্টী কেন্দ্ৰীয় চৰকাৰৰ সহযোগী দল হৈয়ো আগাথা চাংমাই ‘কা’ বিৰোধিতা কৰাটো এক বিশেষ তাৎপৰ্য বহন কৰিছে৷ পূৰ্বৰ মেঘালয়ৰ মুখ্যমন্ত্ৰী মুকুল চাংমাসহ ১১জন বিধায়ক তৃণমূল কংগ্ৰেছত যোগ দিয়াৰ দৰে, আগাথা চাংমাই সেই একে পথ লৈ, তৃণমুল কংগ্ৰেছত যোগদান কৰিব পাৰে বুলি এতিয়া সৰ্বত্ৰে চৰ্চিত হৈছে৷ উল্লেখ্য যে, তৃণমূল কংগ্ৰেছে পূৰ্বৰে পৰা আগ্ৰাসী ৰূপত ‘কা’ বিৰোধিতা কৰি আহিছে৷