কাগজৰ অভাৱত পৰীক্ষা বাতিল হোৱা শুনিছেনে? এই স্থানত সংঘটিত হ’ল সেই কাণ্ড

ডিজিটেল ডেস্কঃ কাগজৰ অভাৱত কেতিয়াবা কোনো পৰীক্ষা বাতিল হোৱা শুনিছেনে? আপুনি নুশুনিলেও বা এনেকুৱা হোৱাটো সম্ভৱ নহয় বুলি ভাবিলেও শ্ৰীলংকাত সংঘটিত হৈছে এই কাণ্ড। শ্ৰীলংকাৰ অৱস্থা আৰ্থিকভাৱে বৰ্তমান অতি শোচনীয়। অৰ্থনৈতিকভাৱে বিধ্বস্ত হৈ পৰা ভাৰতৰ চুবুৰীয়া ৰাষ্ট্ৰ শ্ৰীলংকাৰ সন্মুখত এক সংকটে যথেষ্ট বিষম পৰিস্থিতিৰ সৃষ্টি কৰিছে। আৰ্থিকভাৱে জুৰুলা হৈ পৰা শ্ৰীলংকাই এনে পৰিস্থিতিৰ সন্মুখীন হৈছে যে তেওঁলোকে কাগজ ক্ৰয় কৰিব নোৱাৰা বাবেই স্থগিত ৰাখিব লগীয়া হ’ল পৰীক্ষা। কাগজ ক্ৰয় কৰিব নোৱাৰা বাবেই ১০ লক্ষাধিক স্কুলত অনিৰ্দিষ্টকালৰ বাবে পৰীক্ষা বাতিল কৰিছে শ্ৰীলংকাই। অভাৱনীয় হাৰত বৃদ্ধি পোৱা খাদ্য সংকটৰ সমানে সমানে এইবাৰ দেশখনত দেখা দিছে কাগজৰ সংকটে। উল্লেখ্য যে দেশখনত সোমবাৰৰ পৰা টাৰ্মিনেল পৰীক্ষা অনুষ্ঠিত হোৱাৰ কথা আছিল। হঠাতে শনিবাৰে শ্ৰীলংকা চৰকাৰে পৰীক্ষা বাতিল কৰাৰ কথা ঘোষণা কৰে। শিক্ষা বিভাগে জনোৱা অনুসৰি প্রশ্নকাকত যিসকলে ছপায়, তেওঁলোকৰ ওচৰত পর্যাপ্ত বিদেশী মুদ্রা নথকাৰ বাবেই পৰীক্ষা বাতিল কৰিবলৈ বাধ্য হয়। পৰীক্ষাৰ বাবে যিমান কাগজৰ প্ৰয়োজন সেয়া যোগান ধৰাৰ ক্ষমতা শিক্ষা বিভাগৰ নাই বুলি জানিব পৰা গৈছে। হঠাতে কৰা এই ঘোষণাই মানসিকভাৱে কষ্ট দিছে ছাত্ৰ-ছাত্ৰীসকলক। আৰু পঢ়কঃ অসুস্থ লালু প্ৰসাদ যাদৱ; উন্নত চিকিৎসাৰ বাবে এয়াৰ এম্বুলেঞ্চেৰে দিল্লী এইমছলৈ নিয়াৰ সম্ভাৱনা