ডিজিটেল ডেস্ক: কাইলৈ অসম ভ্ৰমণলৈ আহিব প্ৰধানমন্ত্ৰী নৰেন্দ্ৰ মোদী৷ মোদীৰ ভ্ৰমণৰ পূৰ্বে অসমত সন্ত্ৰাসবাদীৰ ষড়যন্ত্ৰ বিফল কৰা হৈছে। বঙাইগাঁও আৰক্ষীয়ে জনোৱা অনুসৰি, আনছাৰুল বাংলা দল (আল-কায়দাৰ সৈতে জড়িত বুলি আশংকা কৰা এটা গোট)ৰ সৈতে জড়িত তিনিজনক শেহতীয়াকৈ আটক কৰি সোধা-পোছা অব্যাহত ৰখাৰ লগতে মুঠ চাৰিজনক আটক কৰিছে বুলি বঙাইগাঁও আৰক্ষী অধীক্ষকে আজি নিশ্চিত কৰিছে৷ আৰক্ষী অধীক্ষকগৰাকীয়ে ধৃত যুৱককেইজনৰ পৰা আপত্তিজনক নথিপত্ৰও জব্দ কৰা বুলি জানিব পৰা গৈছে৷
বিগত কেইটামান দিনত, অসম আৰক্ষীয়ে আনছাৰুল বাংলা দল (এবিটি) আৰু অল-কায়দা ভাৰতীয় উপমহাদেশ (একিউআইএছ)ৰ সৈতে সম্পৰ্কৰ বাবে ৰাজ্যৰ বিভিন্ন প্ৰান্তৰ পৰা এজন বাংলাদেশী সন্ত্ৰাসবাদীসহ প্ৰায় ১৬ জন লোকক গ্ৰেপ্তাৰ কৰিছে। অতিৰিক্ত আৰক্ষী সঞ্চালকপ্ৰধান (বিশেষ শাখা) হীৰেন নাথে শেহতীয়াকৈ কৈছিল যে এবিটি হৈছে অল-কায়েদা আৰু আইএছআইক সমৰ্থন কৰা এটা গোট।
নাথে সোমবাৰে এএনআইক কয়, তেওঁলোকৰ ভিতৰত বাংলাদেশৰ নাৰায়ণগঞ্জ জিলাৰ বাসিন্দা মোঃ সুমান ওৰফে চাইফুল ইছলাম ওৰফে হাৰুণ ৰছিদ নামৰ যুৱকজন তেওঁ বাংলাদেশৰ পৰা পলাই গৈছিল। বিগত বৰ্ষৰ ফেব্ৰুৱাৰীত ঢাকাৰ সন্ত্ৰাসবাদ বিৰোধী ন্যায়াধীকৰণে ছয়জন ব্যক্তিৰ বিৰুদ্ধে মৃত্যুদণ্ড প্ৰদান কৰিছিল আৰু পলাতক ছয়জন ব্যক্তিৰ ভিতৰত তেৱোঁ অন্যতম আছিল৷
প্ৰধানমন্ত্ৰী নৰেন্দ্ৰ মোদীয়ে কাইলৈ পুৱা ১১ বজাত নগালেণ্ডৰ ডিমাপুৰ বিমানবন্দৰত অৱতৰণ কৰিব৷ আৰু তাৰ পৰা কাৰ্বি আংলং জিলাৰ ডিফুলৈ হেলিকপ্টাৰেৰে আহি লৰিংথেপীত “একতা, শান্তি আৰু উন্নয়ন ৰেলী” সম্বোধন কৰিব আৰু ৫০০ কোটি টকাৰ কেইবাটাও শৈক্ষিক আৰু উন্নয়নমূলক প্ৰকল্পৰ আধাৰশিলা স্থাপন কৰিব।
তাৰ পাছত মোদীয়ে ডিব্ৰুগড়লৈ ৰাওনা হ’ব য’ত তেওঁ অসম চিকিৎসা মহাবিদ্যালয় চিকিৎসালয়ৰ ডিব্ৰুগড় কৰ্কট কেন্দ্ৰ দেশবাসীক উৎসৰ্গা কৰিব। অসম চৰকাৰে বৃহস্পতিবাৰে প্ৰধানমন্ত্ৰী নৰেন্দ্ৰ মোদীৰ দিনজোৰা অসম ভ্ৰমণৰ বাবে ব্যাপক ব্যৱস্থা কৰিছে আৰু মুখ্যমন্ত্ৰী হিমন্ত বিশ্ব শৰ্মাই প্ৰস্তুতিপৰ্ব নিৰীক্ষণ কৰি আছে।
Continue Reading
