কাইলৈ উত্তৰ প্ৰদেশত প্ৰথম পৰ্যায়ৰ নিৰ্বাচন, প্ৰচাৰৰ শেষৰ দিনা আক্ৰমণৰ বলি বিজেপি প্ৰাৰ্থী

ডিজিটেল ডেস্ক : কাইলৈ অনুষ্ঠিত হ'ব উত্তৰ প্ৰদেশৰ বিধানসভা নিৰ্বাচন৷ ৰাজ্যখনৰ নিৰ্বাচনৰ প্ৰথম পৰ্যায়ৰ ভোটগ্ৰহণ ১০ ফেব্ৰুৱাৰীত অনুষ্ঠিত হ'ব। নিৰ্বাচনৰ প্ৰচাৰৰ অন্তিম দিনা বিজেপি প্ৰাৰ্থী সাহেন্দ্ৰ ৰামলাৰ কনভয়লৈ লক্ষ্য কৰি নিক্ষেপ কৰে গোবৰ আৰু শিল। বিজেপি প্ৰাৰ্থী তথা বিধায়ক সাহেন্দ্ৰ ৰামলাৰ কনভয়ত মঙলবাৰে বাগপটৰ ছপ্ৰাউলীত আক্ৰমণ কৰা হৈছিল বুলি অভিযোগ কৰা হৈছে। এই ঘটনা সন্দৰ্ভত বিজেপি নেতাসকলে কয় যে, বিজেপি প্ৰাৰ্থীৰ সমৰ্থনত উলিওৱা এটা শোভাযাত্ৰাৰ সময়তে বাহনসমূহত গোবৰ দলিয়াইছিল। অভিযোগ কৰামতে কনভয়টোলৈ লক্ষ্য কৰি শিলগুটিও নিক্ষেপ কৰা হৈছিল৷ ইয়াৰ উপৰি ৰাষ্ট্ৰীয় লোক দলৰ কাৰ্যালয়ৰ সন্মুখত উপস্থিত হোৱাৰ লগে লগে দলীয় কৰ্মীসকলে পতাকা উৰুৱাই তেওঁলোকৰ বিৰুদ্ধে প্ৰতিবাদ কৰিছিল৷ যাৰ ফলত দুয়োপক্ষৰ মাজত তৰ্কাতৰ্কিৰো সূত্ৰপাত ঘটিছিল। এই কাণ্ডৰ পাছতে ঘটনাস্থলীত ততাতৈয়াকৈ আৰক্ষী উপস্থিত হৈ পৰিস্থিতি নিয়ন্ত্ৰণলৈ আনে। ঘটনা সন্দৰ্ভত এছএইচঅ' বিনোদ কুমাৰে কয় যে তেওঁ এতিয়ালৈকে বিষয়টোৰ বিতং প্ৰতিবেদন লাভ কৰা নাই। আৰক্ষীৰ জৰিয়তে, ফটোগ্ৰাফীৰ পৰা প্ৰাপ্ত তথ্যৰ ওপৰত আধাৰিত কৰি, অপৰাধীসকলক চিনাক্ত কৰা হ'ব আৰু তেওঁলোকৰ বিৰুদ্ধে কঠোৰ ব্যৱস্থা লোৱা হ'ব।