ডিজিটেল ডেস্কঃ বিগত কেইবাদিন ধৰি ‘কালি’ তথ্যচিত্ৰক লৈ বিতৰ্ক অব্যাহত আছে। শেহতীয়াকৈ তথ্যচিত্ৰখনৰ পৰিচালক লীনা মণিমেকলাইক অযোধ্যাৰ এজন পুৰোহিতে মূৰ কাটি পেলোৱাৰ ভাবুকি দিয়ে। তেওঁ লগতে সকীয়াই দিয়ে যে লীনা আৰু তেওঁৰ তথ্যচিত্ৰৰ বিৰুদ্ধে ব্যৱস্থা গ্ৰহণ নকৰিলে তাৰ পৰিণাম তেওঁ ভুগিব লাগিব।
যোৱা মাহত লীনা মণিমেকালাই টুইটাৰত ‘কালি’ তথ্যচিত্ৰখনৰ পোষ্টাৰ টুইট কৰিছিল। তাৰ পিছতেই উক্ত পোষ্টাৰখনক লৈ সৃষ্টি হয় তুমুল বিতৰ্কৰ ।পোষ্টাৰত দেৱী কালিয়ে এখন হাতত ত্ৰিশূল আৰু এখন হাতত এলজিবিটিকিউ সম্প্ৰদায়ৰ গৌৰৱৰ পতাকাও লৈ থকা পৰিলক্ষিত হৈছে । ইয়াৰ ফলত হিন্দুসকলৰ ধৰ্মীয় আৱেগত আঘাত পোৱাৰ অভিযোগ উত্থাপন হৈছে। ইতিমধ্যে দিল্লী আৰু উত্তৰ প্ৰদেশ আৰক্ষীয়ে মণিমেকলাইৰ বিৰুদ্ধে গোচৰ দাখিল কৰিছে।
এনে অৱস্থাত অযোধ্যাৰ হনুমান গড়ী মন্দিৰৰ ৰাজু দাস মহন্তই মণি মণিমেকলাইৰ মূৰ কাটি দিয়াৰ ভাবুকি দিছে। সৰ্বভাৰতীয় সংবাদ মাধ্যমৰ এক প্ৰতিবেদন অনুসৰি তেওঁ কেন্দ্ৰীয় গৃহমন্ত্ৰীক ‘কালি’ তথ্যচিত্ৰখন নিষিদ্ধ কৰিবলৈ দাবী জনাইছে। লগতে পৰিচালকৰ বিৰুদ্ধে ব্যৱস্থা গ্ৰহণৰ দাবী জনায়।
ইয়াৰ পিছতে বহিষ্কৃত বিজেপি নেতা নুপুৰ শৰ্মাৰ প্ৰসংগত কয়, "নুপুৰ শৰ্মাই কথা কোৱা উচিত আছিল, যাৰ ফলত সমগ্ৰ দেশতে এক অগ্নিময় পৰিস্থিতিৰ সৃষ্টি হৈছে। সমগ্ৰ বিশ্বতে যেন ভূমিকম্প হৈছে। আৰু ইয়াত আপুনি (মণি মণিমেকলাই) পৰম্পৰাগত ধৰ্ম আৰু সংস্কৃতিক ঠাট্টা কৰিব? আপুনি কি বিচাৰে? আপোনাৰ মূৰটো শৰীৰৰ পৰা পৃথক হওক! এয়াই ইচ্ছা নেকি ?"
তেওঁ উক্ত তথ্যচিত্ৰখন নিষিদ্ধ কৰাৰ বাবে আহ্বান জনায়।এই তথ্যচিত্ৰখন মুক্তি পালে ভয়াৱহ পৰিণতিৰ কথাও সতৰ্ক কৰি দিয়ে। কিন্তু ইতিমধ্যে কানাডাৰ চলচ্চিত্ৰ মহোৎসৱত ছবিখন প্ৰদৰ্শিত হৈছে।
Continue Reading
