‘কালী’ৰ পৰিচালকৰ শিৰচ্ছেদ কৰিলে ২০ লাখ টকা পুৰস্কাৰ দিম! ঘোষণা কৰিলে মিৰ্চি বাবাই

আৰম্ভ হোৱা বিতৰ্কৰ পাছতেই কানাডস্থিত ভাৰতীয় উচ্চায়োগে এই ঘটনা সন্দৰ্ভত এক বিবৃতি জাৰি কৰে। এই বিবৃতিত কোৱা হৈছে যে কানাডাত বহু হিন্দু নেতাই গোচৰ ৰুজু কৰিছে। ইয়াৰ পাছতেই উচ্চায়োগে সকলো ধৰণৰ বিবাদিত পোষ্টাৰ আঁতৰাই দিবলৈ আহ্বান জনায়। এইবাৰ হৰিদ্বাৰৰ শ্ৰী পঞ্চায়তী নিৰঞ্জনী আখৰাৰ মহামণ্ডলেশ্বৰ স্বামী বৈৰাজ্ঞানন্দ গিৰি মহাৰাজ ধৰ্মগুৰু মিৰ্চি বাবাই দিছে এক বিতৰ্কিত বক্তব্য। হিন্দু দেৱীক অপমান কৰা চলচ্চিত্ৰ লীনা মণিমেকালাইৰ শিৰচ্ছেদ কৰিব পাৰিলে ২০ লাখ টকাৰ পুৰস্কাৰ ঘোষণা কৰিছে ধৰ্মগুৰুগৰাকীয়ে। তেওঁ কয় যে ''হিন্দু ধৰ্মক অপমান কৰাৰ এয়া এক গভীৰ ষড়যন্ত্ৰ। মা কালীক ঘোৰ অপমান কৰা হৈছে। নিৰঞ্জনী আখৰাৰ এজন সাধু হোৱাৰ বাবে মই ঘোষণা কৰিছো যে এনে চিনেমা নিৰ্মাণ কৰাগৰাকীৰ মূৰ কাটিব পৰাজনক মই ২০ লাখ টকা পুৰস্কাৰ দিম। এই বিষয়ে সকলোতে আইনী ব্যৱস্থা গ্ৰহণ কৰা বাবে আবেদন দিয়া হৈছে, কিন্তু আইনীভাৱে একো কৰা নাই, গতিকে নিৰ্মাতাগৰাকীৰ শিৰচ্ছেদ কৰাই হ’ব উত্তম।'' 

মিৰ্চিবাবাৰ বাহিৰেও লীনা মণিমেকলাইক দুদিন পূৰ্বে মুকলিকৈ হত্যাৰ ভাবুকি দিছিল আৰু এগৰাকী হিন্দু ধৰ্মীয় সন্তই। অযোধ্যাৰ হনুমান গড়ী মন্দিৰৰ ৰাজু দাস মহন্ত নামৰ সন্ত গৰাকীয়ে চলচ্চিত্ৰ নিৰ্মাতাগৰাকীক ৰাজহুৱাকৈ শিৰচ্ছেদৰ ভাবুকি প্ৰদান কৰিছে। চলচ্চিত্ৰ নিৰ্মাতাগৰাকীয়ে যদি এতিয়াও ক্ষমা বিচাৰে, তেওঁ ক্ষমা কৰিব পাৰি বুলি মহন্ত ৰাজু দাসে মন্তব্য কৰিছে। সন্ত গৰাকীয়ে লগতে একপ্ৰকাৰে আইন-শৃংখলা পৰিস্থিতিৰ প্ৰতি প্ৰত্যাহ্বান জনাই কয়, “যদি গৃহ মন্ত্ৰালয়ে কোনো পদক্ষেপ গ্ৰহণ নকৰে বা যদি চিনেমাখন মুক্তি পায়, আমি এনে এক পৰিস্থিতিৰ সৃষ্টি কৰিম যে চম্ভালিবলৈ কঠিন হ’ব।”