কাশ্মীৰক পাকিস্তানৰ হাতত গতাই দিয়া উচিতনে? প্ৰশাসনিক সেৱাৰ পৰীক্ষাৰ প্ৰশ্নক লৈ ব্যাপক বিতৰ্ক

ডিজিটেল ডেস্ক : কাশ্মীৰ ভাৰতৰ অবিচ্ছেদ্য অংগ। এই ভূখণ্ডত কেৱল ভাৰতৰহে অধিকাৰ আছে। ভাৰতক বাদ দি কোনো বাহ্যিক শক্তিয়ে এই অমীমাংসিত বিষয়টো সন্দৰ্ভত মাত মতাটো দেশে কামনা নকৰে আৰু এই প্ৰসংগত মাত মতাৰ কাৰো অধিকাৰো নাই। এই কথা বাৰম্বাৰ দোহাৰি আহিছে ভাৰতে। কিন্তু তাৰ পাছতো কাশ্মীৰক লৈ নানা অবাঞ্চিত বিতৰ্কৰ সৃষ্টি হৈ আহিছে।

এইবাৰ প্ৰশাসনিক সেৱাৰ পৰীক্ষাত কাশ্মীৰ প্ৰসংগক অতি অবাঞ্চিতভাৱে উত্থাপন কৰাক লৈ তীব্ৰ চৰ্চা চলিছে। প্ৰশাসনিক সেৱাৰ প্ৰিলিমিনাৰী পৰীক্ষাৰ প্ৰশ্নকাকতত সন্নিৱিষ্ট কৰা এটা প্ৰশ্নক লৈ ব্যাপক সমালোচনাৰ জোৱাৰ উঠিছে। বিভিন্ন ৰাজনৈতিক দল আৰু এই সেৱাত নিৱিষ্ট হ’বলৈ আগ্ৰহী প্ৰাৰ্থীসকলে তীব্ৰ সমালোচনা কৰিছে মধ্যপ্ৰদেশ পাব্লিক ছাৰ্ভিচ কমিছনক।   

ছ’চিয়েল মিডিয়াত ভাইৰেল হৈ পৰা এমপিপিএছচি অসামৰিক সেৱাৰ প্ৰাথমিক পৰীক্ষাত বিতৰ্কিত প্ৰশ্নটো সন্নিৱিষ্ট হোৱা দলটো প্ৰশ্নকাকতখন ভাইৰেল হৈ পৰিছে। কাশ্মীৰ সম্পৰ্কীয় এই প্ৰশ্নটোৱে ব্যাপক প্ৰতিক্ৰিয়াৰ সৃষ্টি কৰিছে। প্ৰশ্নকাকতখনত এটা প্ৰশ্নত সোধা হৈছিল যে, আন্তঃৰাষ্ট্ৰীয় বিবাদৰ সৃষ্টি কৰা জম্মু-কাশ্মীৰক পাকিস্তানৰ হাতত গতাই দিয়া উচিত হয় নে নহয়?

সংবাদ মাধ্যমত প্ৰকাশ পোৱা মতে, পৰীক্ষাৰ্থীসকলক এই প্ৰশ্নটো সোধাৰ লগতে তাৰ উত্তৰ হিচাপে দুটা বিকল্প দিয়া হৈছিল। প্ৰথম বিকল্পটোত আছিল, হয়, ই ভাৰতৰ অৰ্থনৈতিক স্থিতি উন্নত কৰাত সহায় কৰিব। আৰু দ্বিতীয়টো বিকল্প আছিল, নহয়, ই পাকিস্তান প্ৰশাসনৰ গুৰুত্ব তথা দাবী বৃদ্ধি কৰিব। দেশৰ অখণ্ডতাৰ সৈতে জড়িত এটা বিষয়ক এনে অসংবেদনশীলভাৱে উত্থাপন কৰাৰ বাবে এতিয়া ব্যাপক সমালোচনাৰ পাত্ৰ হৈ পৰিছে মধ্যপ্ৰদেশ পাব্লিক ছাৰ্ভিচ কমিচন।