কাঠৰ গুদামত ভয়ংকৰ অগ্নিকাণ্ড ! বিহাৰৰ ১১জনকৈ প্ৰব্ৰজিত শ্ৰমিকৰ মৃত্যু

ডিজিটেল ডেস্ক : এক বিধ্বংসী অগ্নিকাণ্ডই জোকাৰি গৈছে তেলেংগানা৷ তেলেংগানাৰ চেকেন্দ্ৰাবাদ অঞ্চলত এটা কাঠৰ গুদামত সংঘটিত হোৱা এই অগ্নিকাণ্ডৰ ফলত নিহত হৈছে ১১জনকৈ লোকৰ। প্ৰাথমিক তথ্য অনুসৰি এই ঘটনাত ১১জন লোক নিহত হোৱাৰ উপৰিও আন এগৰাকী ব্যক্তি আহত হৈছে বুলি জানিব পৰা গৈছে। স্থানীয় অগ্নিনিৰ্বাপক বাহিনীয়ে জুই নিয়ন্ত্ৰণৰ বাবে চেষ্টা চলায়৷ উল্লেখ্য যে এই ঘটনাত নিহত হোৱা ১১ জন ব্যক্তিয়েই প্ৰব্ৰজিত শ্ৰমিক বুলি তথ্য লাভ কৰিছে। বিহাৰৰ পৰা তেলেংগানাত গৈ কাঠৰ গুদামত কাম কৰি আছিল শ্ৰমিক কেইজনে। এই বিধ্বংসী অগ্নিকাণ্ডৰ সূত্ৰপাত কেনেকৈ হ’ল সেই বিষয়ে জানিব পৰা হোৱা নাই যদিও শ্বৰ্ট চাৰ্কিটৰ ফলতে এই ঘটনা সংঘটিত হোৱা বুলি সন্দেহ প্ৰকাশ কৰিছে। ইপিনে ঘটনা সংঘটিত হোৱাৰ সময়ত ১২ জন শ্ৰমিক প্ৰথম মহলাত শুই আছিল। ইয়াৰে মাত্ৰ এজনহে শ্ৰমিক আহত অৱস্থাত জীৱন্তে উদ্ধাৰ কৰিবলৈ সক্ষম হৈছে। স্থানীয় প্ৰশাসনে মৃতকৰ পৰিয়ালৰ সৈতে যোগাযোগ কৰিবলৈ চেষ্টা কৰিছে। শ্ৰমিকসকলৰ মৃতদেহ হস্তান্তৰ কৰিবৰ বাবে প্ৰশাসনে চেষ্টা অব্যাহত ৰাখিছে। আনহাতে, এই ঘটনাৰ তদন্ত প্ৰক্ৰিয়াও আৰম্ভ কৰিছে।