ডিজিটেল ডেস্কঃ থাইলেণ্ডৰ এগৰাকী মডেলে আঁকোৱালি ল’লে কৰুণ মৃত্যু। ছ’চিয়েল মিডিয়াৰ ইনফুৱেলেন্সাৰ তথা মডেল আৰিছাৰা কাৰ্বদেচোৱে ইমান খৰখেদাকৈ কাবাব খাইছিল যে সেই কাবাবেই তেওঁৰ মৃত্যুৰ কাৰণ হৈ পৰে। কাবাব খাই থাকোতে আৰিছাৰাৰ ডিঙিত লাগি ধৰে আৰু তেওঁক লৰালৰিকৈ চিকিৎসালয়লৈ লৈ যোৱা হয়। আৰিছাৰাৰ অৱস্থাৰ প্ৰতি লক্ষ্য ৰাখি তেওঁক চিকিৎসালয়ত লাইফ চাপ’ৰ্টত ৰখা হৈছিল। কিন্তু দুমাহ লাইফ চাপ’ৰ্টত থকাৰ পিছতো তেওঁৰ জীৱন ৰক্ষা কৰিব পৰা নগ’ল।
আৰিছাৰা কাৰ্বদেচোৰ বয়স আছিল মাত্ৰ ২৭ বছৰ। তেওঁৰ পৰিয়ালৰ লোকে এই দুখৰ খবৰটো নিশ্চিত কৰিছে। মডেলগৰাকীৰ ইনষ্টাগ্ৰাম একাউণ্টত ১৫ লাখতকৈ অধিক ফ’ল’ৱাৰ আছে। ছ’চিয়েল মিডিয়াত আৰিছাৰা যথেষ্ট বিখ্যাত আছিল। এই মডেলগৰাকী ইনষ্টাগ্ৰামত অতি সক্ৰিয় আছিল আৰু প্ৰায়ে তেওঁৰ নতুন ফটো প’ষ্ট কৰিছিল। মডেলগৰাকীৰ মাতৃয়ে জনোৱা অনুসৰি সেইদিনা ব্যস্ততাৰ বাবে খৰখেদাকৈ খাদ্য খাইছিল আৰিছাৰাই। খৰখেদাকৈ গাহৰিৰ মাংসৰ কাবাব আৰু ভাত খাই থাকোতে তেওঁৰ ডিঙিত মাংস এটুকুৰা আবদ্ধ হৈ পৰিছিল।
চিকিৎসকৰ মতে আৰিছাৰাৰ চিকিৎসালয় পোৱাত ৯ মিনিট পলম হৈছিল যাৰ বাবে তেওঁৰ জীৱন ৰক্ষা কৰিব পৰা নগ’ল। আচলতে তেওঁৰ মগজুলৈকে অক্সিজেন গৈ পোৱা নাছিল, যাৰাবাবে আৰিছাৰাক লাইফ চাপৰ্ট দিয়া হৈছিল। নিজ কন্যাক হেৰুৱাই আৰিছাৰাৰ মাতৃয়ে যুৱক-যুৱতীসকলক খাদ্য আৰু স্বাস্থ্যৰ প্ৰতি গুৰুত্ব দিবলৈ অনুৰোধ জনাইছে।
