কি ঘটিছে এয়া গুজৰাটত? দৈনিক সংঘটিত হৈছে পাঁচটাকৈ ধৰ্ষণ

ডিজিটেল ডেস্ক: গুজৰাটৰ সামাজিক প্ৰেক্ষাপটক লজ্জানত কৰা এক ভয়ংকৰ চৰকাৰী তথ্য পোহৰলৈ আহিছে৷ গুজৰাটত প্ৰতিদিনে সংঘটিত হয় পাঁচটাকৈ ধৰ্ষণৰ ঘটনা৷ ২০২০ আৰু ২০২১ত প্ৰতিদিনে গড়ে পাঁচটাকৈ ধৰ্ষণৰ ঘটনা সংঘটিত হৈছিল ৰাজ্যখনত। ২০২১ৰ ৩১ ডিচেম্বৰলৈ গুজৰাটত মুঠ ৩,৭৯৬টা ধৰ্ষণ আৰু ৬১টা দলবদ্ধ ধৰ্ষণৰ গোচৰ পঞ্জীয়ন কৰা হৈছিল।আহমেদাবাদ চহৰত ৬১৪টা ধৰ্ষণ আৰু ১৫টা দলবদ্ধ ধৰ্ষণৰ ঘটনা সংঘটিত হৈছিল৷ ৰাজ্য চৰকাৰে বিধানসভাত প্ৰশ্নৰ উত্তৰত কয় যে, আহমেদাবাদ চহৰ আৰু জিলাত ৭২৯টা ধৰ্ষণ আৰু ১৬টা দলবদ্ধ ধৰ্ষণৰ ঘটনা সংঘটিত হৈছে। ইয়াৰ পাছত চুৰাটত ৫০৮ টা ধৰ্ষণ আৰু পাঁচটা দলবদ্ধ ধৰ্ষণ আৰু বদোদৰাত ১৮৩ টা ধৰ্ষণ আৰু ৪ টা দলবদ্ধ ধৰ্ষণৰ ঘটনা সংঘটিত হৈছে৷ চৰকাৰে লগতে কয়, ধৰ্ষণৰ অভিযোগত অভিযুক্ত ২০৩জন লোকক এতিয়াও গ্ৰেপ্তাৰ কৰা হোৱা নাই। এক সম্পৰ্কিত প্ৰশ্নৰ উত্তৰত গৃহ ৰাজ্যমন্ত্ৰী হৰ্ষ সংঘৱীয়ে কয় যে ২০২০ত গুজৰাটত মহিলাৰ বিৰুদ্ধে অপৰাধৰ ৮,০২৮টা গোচৰ ৰুজু কৰা হৈছিল। কংগ্ৰেছৰ ওপৰত অভিযোগ আৰোপ কৰি সংঘৱীয়ে কয় যে, গুজৰাটত মহিলাৰ বিৰুদ্ধে অপৰাধৰ ৮,০০০টা গোচৰৰ বিপৰীতে মহাৰাষ্ট্ৰত এনে ধৰণৰ ৩১,৯৫৪ টা আৰু ৰাজস্থানত ৩৪,৫৩৫ টা গোচৰ আছে, য’ত কংগ্ৰেছৰ চৰকাৰ চলি আছে৷ সদনত চৰকাৰে লগতে কয়, ২০২০ত ধৰ্ষণৰ ২৬১টা ঘটনাৰ আহমেদাবাদ চহৰত ১৩০টা ঘটনাৰ ক্ষেত্ৰত মহিলাগৰাকীক বিবাহৰ প্ৰতিশ্ৰুতি দিয়া হৈছিল। ২০২১ত ধৰ্ষণৰ ৩৫৩টা ঘটনাৰ ভিতৰত ১৮৪টাত বিবাহৰ প্ৰতিশ্ৰুতি জড়িত আছিল।