ডিজিটেল ডেস্কঃ বিশ্বকাপত অষ্ট্ৰেলিয়াৰ বিৰুদ্ধে শতক অৰ্জন কৰে আফগানিস্তানৰ ইব্ৰাহিম জাদ্ৰানে। প্ৰথম আফগান ক্ৰিকেটাৰ হিচাপে তেওঁ বিশ্বকাপত শতক অৰ্জন কৰি এক নজিৰ গঢ়ি তুলিছে। মুম্বাইৰ ৱানখেদে ষ্টেডিয়ামত অনুষ্ঠিত খেলখনৰ প্ৰাকক্ষণত আফগানিস্তানৰ ক্ৰিকেটাৰসকলক পৰামৰ্শ দিয়ে শচীন টেণ্ডুলকাৰে। সেই পৰামৰ্শৰে ইব্ৰাহিমে শচীনৰ নজিৰ ভংগ কৰিলে। তেওঁ বিৰাট কোহলীৰো অভিলেখ ভংগ কৰিলে।
ইব্ৰাহিমে মঙলবাৰে ৱানখেদেত ২১ বছৰ ৩৩০ দিনত এই শতক কৰে। বিশ্বকাপৰ আটাইতকৈ কম বয়সীয়া হিচাপে শতকৰ তালিকাত তেওঁ চতুৰ্থ স্থানত আছে। তালিকাৰ শীৰ্ষত আছে আয়াৰলেণ্ডৰ পল ষ্টাৰলিং। ২০১১ চনৰ বিশ্বকাপত ২০ বছৰ ১৯৬ দিন বয়সত শতক অৰ্জন কৰিছিল। বিৰাটে ২২ বছৰ ১০৬ দিন বয়সত বিশ্বকাপত প্ৰথম শতক অৰ্জন কৰে। শচীনে ২২ বছৰ ৩০০ দিন বয়সত কৰিছিল। ইব্ৰাহিমে সেই দুটা নজিৰ ভংগ কৰিলে।
ৱানখেদেত শতিকাটোৰ পাছতো ইব্ৰাহিমৰ মুখত শচীনৰ কথা আহিল। তেওঁ ক'লে, "শচীন ছাৰৰ লগত বহুদিন কথা পাতিলোঁ। তেওঁ মোক বহু অভিজ্ঞতা ক’লে। মই কিমান সুখী সেয়া শব্দৰে প্ৰকাশ কৰিব নোৱাৰি। তেওঁৰ লগত কথা পাতি মোৰ আত্মবিশ্বাস বহুত বৃদ্ধি পাইছে। সেই আত্মবিশ্বাসেৰে খেলিলোঁ৷’’
Continue Reading
