ক্ৰিকেট বিশ্বকাপঃ অনুৰাগীয়ে আজিও সোঁৱৰে মহেন্দ্ৰ সিং ধোনী, কৰ্টনী ৱালছৰ স্পৰ্টছমেন স্পিৰিট

১৯৮৭ চনৰ বিশ্বকাপ কোৱাৰ্টাৰ ফাইনেলত ৱেষ্ট ইণ্ডিজ বনাম পাকিস্তানৰ মেচ হৈছিল। লাহোৰত হোৱা এই মেচখনত ৱেষ্ট ইণ্ডিজে পাকিস্তানক টাৰ্গেট দিছিল ২১৬। পাকিস্তানক শেষৰ অভাৰটোত জিকিবলৈ লাগিছিল ১৪ ৰাণ। আব্দুল কাদিৰ আৰু চেলিম জাফৰ আছিল ক্ৰীজত। ৱেষ্ট ইণ্ডিজৰ বলাৰ আছিল কৰ্টনী ৱাল্ছ। প্ৰথম দুটা বলত এক এক কৈ দুই ৰাণ ল’লে কাদিৰে। তৃতীয় বলত কাদিৰে দুই ৰাণ ল’লে। চতুৰ্থ বলত ছয় মাৰে। পঞ্চম বলটোতো কাদিৰে দুই ৰাণ ল'লে। শেষ বলটোত পাকিস্তানক জিকিবলৈ লাগে দুই ৰাণ। ষ্ট্ৰাইকত কাদিৰ, নন-ষ্ট্ৰাইকত জাফৰ। ৱালছে বল ডেলিভাৰ কৰাৰ পূৰ্বেই জাফৰে নিজৰ ক্ৰীজ এৰিলে। ৱালছে ইচ্ছা কৰা হ'লে সহজতে জাফৰক মানকাড কৰিব পাৰিলহেতেন। কিন্তু নকৰিলে। বৰং সতৰ্কহে কৰি দিলে। শেষ বলটোত কাদিৰে দুই ৰাণ লোৱাত পাকিস্তান জিকিছিল। পাকিস্তানে কোৱাৰ্টাৰ ফাইনেল জিকিছিল, কিন্তু ৱেষ্ট ইণ্ডিজ আৰু কৰ্টনী ৱালছে হৃদয় জিনিছিল। ইয়াকে কোৱা হয় ক্ৰীড়াসুলভ মানসিকতা।

ভাৰত বনাম ইংলেণ্ডৰ টেষ্ট মেচ। ২০১১ চন। স্থান- ইংলেণ্ডৰ অভেল। ইংলেণ্ডৰ ইয়ান বেলে শতকীয় ইনিংছ খেলি আছিল৷ ড্ৰিংকচ্ ব্ৰেকৰ আগত তেওঁ এটা বল বাউণ্ডেৰী মাৰে৷ কিন্তু বলটো বাউণ্ডেৰী ৰৈ যায়। প্ৰবীন কুমাৰে বলতো ধোনীলৈ দলিয়াই ৷ ধোনীয়ে বলটো ষ্টেম্পত লগাই আপীল কৰে ৷ ইয়ান বেলে সেইটো চাৰি হ'ল বুলি ভাৱি ক্ৰিজৰ পৰা ওলাই আছিল৷ কিন্তু প্ৰকৃততে চাৰি হোৱা নাছিল ৷ ধোনীয়ে আপীল কৰাত থাৰ্ড আম্পায়াৰে আউট দিলে৷ ইয়ান বেল, ইংলেণ্ড দল, দৰ্শক সকলো আচৰিত হ’ল৷ কিন্তু ড্ৰিংকচ্ ব্ৰেকৰ পাছত সকলোকে আচৰিত কৰি ইয়ান বেল পুণৰ খেলপথাৰলৈ বেট ধৰিবলৈ আহে ৷ ইয়াৰ কাৰণ আছিল ভাৰতৰ কেপ্টেইন ধোনীয়ে ইয়ান বেলে যে নাজানিহে ক্ৰিজৰ পৰা বাহিৰত আছিল, সেয়া গম পায় আৰু বেটাৰগৰাকীক পুনৰ মাতি আনে। সকলোৱে ধোনীক শলাগ লয়।