ডিজিটেল ডেস্কঃ শেষ ৰক্ষা নহ’ল! হেজাৰ প্ৰচেষ্টাৰ পিছতো কৰ’না সংক্ৰমণক বাধা দি ৰাখিব নোৱাৰিলে কিম জং-উনৰ উত্তৰ কোৰিয়াই। অমিক্ৰনত আক্ৰান্ত কিম জং উনৰ দেশৰ নাগৰিক। মাত্ৰ ৩ দিনত আক্ৰান্ত কেইবা লক্ষাধিক ব্যক্তি। পূৰ্বৰ তুলনাত বৃদ্ধি পাইছে মৃত্যুৰ হাৰো। পৰিস্থিতি নিয়ন্ত্ৰণ কৰিবলৈ সমগ্ৰ উত্তৰ কোৰিয়াত লকডাউনৰ ঘোষণা কিমৰ। কিন্তু কিমে পৰিস্থিতি নিয়ন্ত্ৰণলৈ আনিব পাৰিব নে নাই সেয়া হৈ এতিয়া চিন্তনীয় বিষয় হৈ পৰিছে।
উত্তৰ কোৰিয়াৰ চৰকাৰী সংবাদ সংস্থা কেচিএনএ-ই কয়, ‘দেওবাৰে পুৱা জ্বৰৰ প্ৰকোপত আৰু ১৫ জন লোকৰ মৃত্যু হয়। ফলস্বৰূপে, দেশত মুঠ মৃতকৰ সংখ্যা ৪২ জনলৈ লৈ বৃদ্ধি পাইছে। সংক্ৰমিত লোকৰ সংখ্যা আৰু বৃদ্ধি পোৱাৰ আশংকা কৰিছে সংবাদ সংস্থাটোৱে। প্ৰথম অমিক্ৰনত আক্ৰান্তৰ খবৰ পোহৰলৈ অহাৰ ৩ দিনৰ ভিতৰত উত্তৰ কোৰিয়াত কৰ’না ৰোগীৰ সংখ্যা ৮,২০,৬২০ লৈ বৃদ্ধি হৈছে। ইয়াৰে ভিতৰত কমেও ৩,২৪,৫৫০ জন চিকিৎসাধীন হৈ আছে।
স্বাভাৱিকতে, দেশখনৰ কৰ’না পৰিস্থিতিক লৈ চিন্তিত ৰাষ্ট্ৰপ্ৰধান কিম জং-উন। তেওঁ কয়, ‘এই সংক্ৰমণৰ ফলত উত্তৰ কোৰিয়াত এক বৃহৎ পৰিৱৰ্তন আহিছে। দেশৰ অৰ্থনীতিতো ইয়াৰ প্ৰভাৱ পৰিছে। এতিয়ালৈকে এই দেশখনত কৰ’নাই আটাইতকৈ ডাঙৰ দুৰ্যোগ হিচাপে বিবেচিত হৈছে।
মন কৰিবলগীয়া যে, বৃহস্পতিবাৰে ৰাজধানী পিয়ংইয়ংত প্ৰথমটো অমিক্ৰনত আক্ৰান্তৰ ঘটনা পোহৰলৈ আহিছিল। কিমৰ কাণত এই খবৰ পৰাৰ লগে লগে একেদিনাই লকডাউনৰ কথা ঘোষণা কৰিছিল। তাৰ পিছতো শেষ ৰক্ষা নহ’ল। মাত্ৰ ৩ দিনৰ ভিতৰতে, উত্তৰ কোৰিয়াত এতিয়া লক্ষ লক্ষ লোক কৰ’নাত আক্ৰান্ত।
Continue Reading
