কিয় ইমান সংক্ৰামক অ’মিক্ৰন? গৱেষকৰ অধ্যয়ন পোহৰলৈ আহিল ভয়ংকৰ তথ্য!

ডিজিটেল ডেস্ক : বিশ্বজুৰি ক’ভিড সংক্ৰমণৰ গতিক তীব্ৰতা দিছে ইয়াৰ নতুন প্ৰকাৰ অ’মিক্ৰন। ক’ভিডৰ সকলো প্ৰকাৰতকৈ এই অ’মিক্ৰন প্ৰকাৰ অধিক সংক্ৰামক হিচাপে বিবেচিত হৈছে। কিন্তু কিহৰ বাবে এই অ’মিক্ৰণ অধিক সংক্ৰামক হিচাপে বিবেচিত হৈছে? বিশেষজ্ঞসকলৰ অধ্যয়নত এই বিষয়ে এক নতুন তথ্য প্ৰকাশ পাইছে। বিশেষজ্ঞসকলে এই অধ্যয়নত প্ৰকাশ কৰিছে যে, কৰ’নাৰ অ’মিক্ৰন প্ৰকাৰ মানুহৰ ছালত ২১ঘণ্টালৈকে সক্ৰিয় হৈ থাকে আৰু প্লাষ্টিক আৱৰণৰ ওপৰত ই আঠ দিনলৈকে সক্ৰিয় হৈ থাকে। এই কাৰণটোৰ বাবেই ক’ভিডৰ আন প্ৰকাৰৰ তুলনাত অ’মিক্ৰণ অধিক সংক্ৰমিত হোৱাৰ সম্ভাৱনাৰ কথা প্ৰকাশ কৰিছে বিশেষজ্ঞসকলে। জাপানৰ কেয়টো প্ৰিফেকচাৰেল ইউনিভাৰ্চিটীৰ গৱেষকসকলে কৰ’নাৰ দুটা প্ৰকাৰৰ মাজৰ ভাইৰেল এনভাৰমেণ্টেল ষ্টেবিলিটী সম্পৰ্কত অধ্যয়ন কৰিছিল। এতিয়াও পুনৰ মূল্যায়ন কৰিবলৈ বাকী থকা এই অধ্যয়নৰ বিষয়ে প্ৰিপ্ৰিণ্ট ৰেপ’ছিট’ৰী বায়’ৰেক্সিভত প্ৰকাশ কৰা হৈছে। য’ত প্ৰকাশ পাইছে যে, আলফা, বিটা, ডেল্টা আৰু অ’মিক্ৰনৰ প্ৰকাৰে কৰ’নাৰ মূল যিটো প্ৰকাৰ তাতকৈ দুগুণ বেছি সময়ত ছাল আৰু প্লষ্টিক আৱৰণৰ ওপৰত বৰ্তি থাকিব পাৰে। এইবোৰ ভিতৰত আকৌ অ’মিক্ৰনে আটাইতকৈ বেছি সময়ত সক্ৰিয় হৈ থাকে যাৰ বাবে এই প্ৰকাৰবিধ অধিক দ্ৰুতগতিত সংক্ৰমিত হৈছে আৰু ই অতি কম সময়ৰ ভিতৰতে সমগ্ৰ বিশ্বতে দমনীয় ৰূপ ধাৰণ কৰিছে। অধ্যয়নটোত প্ৰকাশ পোৱা মতে প্লাষ্টিক আৱৰণৰ ওপৰত কৰ’নাৰ মূল প্ৰকাটো সক্ৰিয় হৈ থকাৰ সময় হৈছে ৫৬ঘণ্টা। আনহাতে ইয়াৰ আলফা, বিটা, গামা আৰু ডেল্টা সক্ৰিয় হৈ থকা সময় হৈছে ক্ৰমে ১৯১.৩ঘণ্টা, ১৫৬.৬ঘণ্টা, ৫৯.৩ঘণ্টা আৰু ১১৪ঘণ্টা। আনহাতে এইসকলোকে অতিক্ৰমি অ’মিক্ৰন প্লাষ্টিকৰ ওপৰত ১৯৩.৫ঘণ্টা সক্ৰিয় হৈ থাকে। আনহাতে মানুহৰ দেহৰ ছালত অ’মিক্ৰণ প্ৰকাৰ আটাইকেইটা প্ৰকাৰতকৈ বেছি সময় অৰ্থাৎ ২১.১ঘণ্টা সক্ৰিয় হৈ থাকে। বিশ্বজুৰি অতি দ্ৰুতগতিত অ’মিক্ৰন প্ৰকাৰ সংক্ৰমিত হোৱাৰ এয়া এক উল্লেখযোগ্য কাৰণ হিচাপে বিবেচনা কৰিছে গৱেষকসকলে। তুলনামূলকভাৱে অ’মিক্ৰমণৰ সংক্ৰমণ কিছু মৃদু হ’লেও ই সামূহিক সংক্ৰমণৰ ৰূপ তাৎক্ষণিকভাৱে লোৱাটো সমগ্ৰ বিশ্বৰ স্বাস্থ্যখণ্ডৰ বাবে প্ৰত্যাহ্বানৰ কাৰণ হৈ পৰিছে। ভাৰততো বিশেষকৈ বৃহৎ নগৰ অঞ্চলত কৰ’নাৰ এই নতুন প্ৰকাৰে দমনীয় ৰূপ ধাৰণ কৰিছে।