ডিজিটেল ডেস্কঃ অৰুণাচল প্ৰদেশৰ কামেং নদী হঠাতে ক'লা হৈ পৰিল। যাৰ ফলত হাজাৰ হাজাৰ মাছৰ মৃত্যু হয়। নদীখনৰ হাজাৰ হাজাৰ মৰা মাছ ওপঙি উঠাত আতংক বিয়পি পৰিছে পূব কামেং জিলাত। কামেং নদীখনৰ পানী ক'লা হোৱাৰ কাৰণ হিচাপে পানীত TDSৰ পৰিমাণ বৃদ্ধি হোৱা বুলি দাবী কৰিছে চেপ্পা জিলা মীন বিষয়াই। নৈখনৰ মাছ নাখাবলৈ স্থানীয় লোকসকলক প্ৰশাসনে আহ্বান জনাইছে।
চেপ্পা গাঁৱৰ বাসিন্দাসকলে চীনক দোষাৰোপ কৰি দাবী কৰিছে যে সীমান্তৰ ওপৰেৰে চুবুৰীয়া দেশখনে চলোৱা নিৰ্মাণ কাৰ্যকলাপৰ বাবে টিডিএছৰ স্তৰ বিপদজনকভাৱে উচ্চ হৈ গৈছে।চেপ্পা পূবৰ বিধায়ক তাপুক টাকুৱে ৰাজ্য চৰকাৰক কামেং নদীৰ পানীৰ আকস্মিক পৰিৱৰ্তন আৰু বৃহৎ পৰিমাণৰ মাছৰ মৃত্যুৰ কাৰণ জানিবলৈ তাৎক্ষণিকভাৱে বিশেষজ্ঞৰ এখন সমিতি গঠন কৰিবলৈ আহ্বান জনায়।
উল্লখ্য যে ২০১৭ চনত পাচিঘাটত চিয়াং নদীৰ পানী ক'লা হৈছিল। চিয়াঙৰ পানী জিংজিয়াঙালৈ নিবলৈ চীনে ১০,০০০ কিলোমিটাৰ দীঘল সুৰংগ নিৰ্মাণ কৰা বাবে পানী ঘোলা হোৱা বুলি দাবী কৰিছিল অৰুণাচল পূবৰ সাংসদ নিনং এৰিঙে। এতিয়া এইবাৰ কামেঙৰ পানী হঠাতে ক'লা হৈ যোৱাত উদ্বিগ্ন হৈ পৰিছে স্থানীয় লোক। স্থানীয় লোকসকলে আতংক প্ৰকাশ কৰি কয় যে যদি এনেকুৱাকৈ অধিক সময় ধৰি চলি থাকে, তেন্তে নদীৰ পৰা জলজ জীৱন সম্পূৰ্ণৰূপে নাইকিয়া হ'ব।" ২০১৭ চনত চীনৰ প্ৰতি উঠা অভিযোগ অস্বীকাৰ কৰিছিল চীনে। এইবাৰ আকৌ চীনৰ ওপৰতে সন্দেহৰ প্ৰশ্ন উঠাত চীনে কি উত্তৰ দিয়ে সেয়াহে হ'ব লক্ষ্যণীয়।
Continue Reading
