কলকাতাৰ আৰ.জি.কৰ কাণ্ড! ভুক্তভোগীৰ পৰিয়ালক উৎকোচ দিয়াৰ প্ৰচেষ্টা আৰক্ষীৰ

ডিজিটেল ডেস্ক: কলকাতা আৰ.জি.কৰ কাণ্ডক কেন্দ্ৰ কৰি পোহৰলৈ আহিছে নতুন তথ্য৷ এই ঘটনাক কেন্দ্ৰকৰি উত্তাল হৈ আছে সমগ্ৰ দেশ৷ সৰৱ হৈ উঠিছে দেশৰ প্ৰতিটো স্তৰৰ লোক৷ শিল্পীয়ে ঘূৰাই দিছে বঁটা৷ ইয়াৰ মাজতে পোহৰলৈ আহিছে এক চাঞ্চল্যকৰ তথ্য৷ আৰক্ষী প্ৰশাসনে  উৎকোচ দিবলৈ চেষ্টা কৰিছে ভুক্তভোগীৰ পৰিয়ালক৷  

প্ৰাপ্ত তথ্য অনুসৰি ন্যায় বিচাৰ চলি থকা সময়তে পুলিচ প্ৰশাসনে ভুক্তভোগীৰ পৰিয়ালক অপোচৰ বাবে হেঁচা প্ৰয়োগ কৰি আহিছে বুলি দাবী উত্থাপন কৰিছে ভুক্তভোগীৰ পৰিয়ালে৷ ভুক্তভোগীৰ পৰিয়ালৰ লোকে সদৰি কৰা অনুসৰি আৰক্ষীয়ে খৰখেদাকৈ কন্যাৰ মৃতদেহ দাহ কৰি বিষয়টো ঢাকি ৰখাৰ প্ৰয়াস কৰাৰ লগতে উৎকোচ দিবলৈও চেষ্টা কৰিছিল৷পৰিয়ালৰ লোকক মৃতদেহটো চাবলৈ দিয়া নাছিল আৰু মৃতদেহটো মৰণোত্তৰ পৰীক্ষাৰ বাবে লৈ যাবলৈয়ো থানাত অপেক্ষা কৰিব লগীয়া হৈছিল। মৰণোত্তৰ পৰীক্ষাৰ পাছত মৃতদেহটো পৰিয়ালৰ হাতত গতাই দিয়াৰ সময়ত এজন জ্যেষ্ঠ আৰক্ষী বিষয়াই উৎকোচৰ প্ৰস্তাৱ দিছিল, লগে লগে পৰিয়ালৰ লোকে এই প্ৰস্তাৱ নাকচ কৰে। বুধবাৰে নিশা আৰ জি কৰ মেডিকেল কলেজ এণ্ড হস্পিতালত কনিষ্ঠ চিকিৎসক সকলৰ সৈতে প্ৰতিবাদী কাৰ্যসূচীত অংশগ্ৰহণ কৰি কন্যাৰ ন্যায়ৰ দাবী কৰিছে পৰিয়ালৰ লোকে।

ভুক্তভোগীৰ পৰিয়ালৰ ন্যায়ৰ দাবীত বুধবাৰে পশ্চিম বংগৰ হাজাৰ হাজাৰ মহিলাই মাজনিশা ‘ৰিক্লেইম দ্য নাইট’ অভিযানৰ অধীনত সমদল উলিয়াই, আৰু এঘণ্টা ধৰি ঘৰৰ লাইট বন্ধ কৰি হাতত চাকি লৈ ৰাজপথলৈ ওলাই আহে কলকাতাবাসী। 

আৰক্ষী প্ৰশাসনৰ এনে মেৰুদণ্ডহীন কাৰ্যই ন্যায় ব্যৱস্থাৰ ওপৰত প্ৰশ্ন উত্থাপিত কৰাৰ লগতে আৰক্ষী প্ৰশাসনৰ এনে আচৰণে গৃহ বিভগৰো ফোঁপোলা স্বৰূপ দাঙি ধৰিছে৷