কৰ্মচাৰীসকললৈ নৰেন্দ্ৰ মোদীৰ বিশেষ উপহাৰ! লাভান্বিত হ'ব কৰ্মচাৰী - পেঞ্চনাৰসকল

ডিজিটেল ডেস্ক : নৰেন্দ্ৰ মোদীয়ে উপহাৰ দিব কৰ্মচাৰীসকলক৷ হোলীৰ পূৰ্বে এই সিদ্ধান্ত প্ৰধানমন্ত্ৰী নৰেন্দ্ৰ মোদীৰ৷ কেন্দ্ৰীয় চৰকাৰে চৰকাৰী কৰ্মচাৰীসকলক মহাৰ্ঘভাট্টা (Dearness Allowance) উপহাৰ দিয়াৰ সম্ভাৱনা আছে। যাৰ ফলত লাখ লাখ চৰকাৰী কৰ্মচাৰী লাভান্বিত হ'ব৷ শেহতীয়া মুদ্ৰাস্ফীতি বৃদ্ধিৰ সৈতে মোকাবিলা কৰাত সহায় কৰিবলৈ চৰকাৰী কৰ্মচাৰী আৰু পেঞ্চনাৰলৈ প্ৰদান কৰা হ'ব এই ভাট্টা। যদিও এই সম্পৰ্কীয় সিদ্ধান্ত গ্ৰহণৰ বাবে বৈঠকৰ কাৰ্যসূচী এতিয়াও ঘোষণা কৰা হোৱা নাই, কেবিনেট মন্ত্ৰীসকলে কেন্দ্ৰীয় চৰকাৰৰ কৰ্মচাৰীসকলৰ মহাৰ্ঘ ভাট্টা (ডিএ)ত বৃদ্ধিৰ বিষয়ে আলোচনা কৰাৰ সম্ভাৱনা আছে। বৰ্তমান, কেন্দ্ৰীয় চৰকাৰৰ কৰ্মচাৰী আৰু পেঞ্চনাৰসকলক প্ৰদান কৰা মহাৰ্ঘ ভাট্টা হৈছে ৩১ শতাংশ আৰু বৈঠকত ৩ শতাংশ বৃদ্ধি ঘোষণা কৰা হ'ব বুলি আশা কৰা হৈছে। এই বৃদ্ধিয়ে সংখ্যাটো ৩৪শতাংশলৈ লৈ যাব৷ বৈঠকখন বাজেট অধিৱেশনৰ চলিত দ্বিতীয় পৰ্যায়ৰ মাজত অনুস্থিত হ'ব। মহাৰ্ঘভাট্টা কি? কৰ্মচাৰীসকলৰ দৰমহাৰ ওপৰত মুদ্ৰাস্ফীতিয়ে পোলোৱা প্ৰভাৱ আঁতৰ কৰিবলৈ কেন্দ্ৰীয় চৰকাৰৰ কৰ্মচাৰীসকলক মহাৰ্ঘভাট্টা পৰিশোধ কৰা হয়। এইটো কৰ্মচাৰী আৰু পেঞ্চনাৰ দুয়োৰে বাবে প্ৰযোজ্য। সপ্তম দৰমহা আয়োগৰ অধীনত, জানুৱাৰী আৰু জুলাইত বছৰত দুবাৰকৈ ডিএ বৃদ্ধি কৰা হয়। ডিএ-ৰ বৃদ্ধি কৰ্মচাৰীৰ অৱস্থানৰ ওপৰতো নিৰ্ভৰ কৰে যি হৈছে চহৰ, গ্ৰাম্য, বা অৰ্ধ-নগৰীয়া এলেকা। যদি আজিৰ বৈঠকত ডিএ বৃদ্ধিৰ সিদ্ধান্ত লোৱা হয়, ই এক কোটিৰো অধিক কৰ্মচাৰী আৰু পেঞ্চনাৰক লাভান্বিত কৰিব। কেন্দ্ৰীয় চৰকাৰৰ বৰ্তমান ৪৮ লাখ কৰ্মচাৰী আৰু ৬৫ লাখ পেঞ্চনাৰ আছে। বিগত বছৰ অক্টোবৰৰ শেষত ডিএ বৃদ্ধি কৰা হৈছিল৷ ২৮ শতাংশৰ পৰা ৩১ শতাংশলৈ বৃদ্ধি কৰা হৈছিল ডিএ।