কৰ’নাত অতিৰিক্ত ৪০লাখৰ মৃত্যু, The Lancetৰ সমীক্ষাত প্ৰকাশ পাইছে চাঞ্চল্যকৰ তথ্য

ডিজিটেল ডেস্কঃ ক’ৰনাৰ সন্ত্ৰাস এতিয়াও মাৰ যোৱা নাই। কৰ’নাৰ প্ৰথম ঢৌৰ পাছত দ্বিতীয় আৰু তৃতীয় ঢৌৱে কেনে এক সন্ত্ৰাসৰ সৃষ্টি কৰিছিল সেয়া সকলোৰে অৱগত। সম্প্ৰতি বিভিন্ন দেশত কৰ’নাসৃষ্ট পৰিৱেশ পৰিস্থিতি সামান্য স্থিতিশীল পৰ্যায়লৈ গ’লেও সম্পূৰ্ণৰূপে নিৰ্মূল কৰিব পৰা হোৱা নাই।  ক’ৰনাৰ প্ৰাদূৰ্ভাৱ বৰ্তি থকা সময়তে The Lancet কাকতত প্ৰকাশিত শেহতীয়া তথ্যই সকলোকে হতচকিত কৰি তুলিছে। কাকতখনত প্ৰকাশিত এক সমীক্ষাত ক’ভিড-১৯ মহামাৰীৰ ফলত মৃত্যু হোৱা ৰোগীৰ সংখ্যা চৰকাৰী ৰেকৰ্ডতকৈ তিনিগুণ অধিক হ'ব পাৰে বুলি শেহতীয়াকৈ প্ৰকাশ পাইছে। বিশ্বৰ ১৯১খন দেশৰ লগতে, ইউনিয়ন টেৰিট’ৰী আৰু ২৫২খন নিৰ্বাচিত উপৰাষ্ট্ৰীয় ইউনিটক লৈ কাকতখনে চলাইছিল এই সমীক্ষা। কাকতখনে সদৰী কৰা মতে, ১ জানুৱাৰী, ২০২০ আৰু ৩১ ডিচেম্বৰ, ২০২১-ৰ ভিতৰত ক’ভিড-১৯ মহামাৰীৰ কবলত পৰি আনুষ্ঠানিকভাৱে বিশ্বব্যাপী মৃত্যু হোৱা ৰোগীৰ সংখ্যা চৰকাৰী সমীক্ষাত প্ৰকাশিত তথ্যৰ মাজত প্ৰভেদ দেখিবলৈ পোৱা গৈছে। চৰকাৰী ৰেকৰ্ডত প্ৰকাশ পোৱা মতে, ক’ভিডাক্ৰান্তৰ মৃত্যুৰ সংখ্যা আছিল ৫.৯ নিযুত। কিন্তু শেহতীয়া সমীক্ষাত প্ৰকাশ পোৱা মতে প্ৰায় ১৮.২ নিযুত অতিৰিক্ত ক’ভিডৰোগীৰ মৃত্যু হৈছিল নিৰ্দিষ্ট সময়ছোৱাত। ক’ভিড-১৯ মহামাৰীৰ ফলত বিশ্বব্যাপী মৃত্যুৰ হাৰ জনসংখ্যাৰ প্ৰতি একলাখ জনসংখ্যাৰ ভিতৰত ১১৩ৰ পৰা ১২০জনলোকৰ মৃত্যু হৈছিল। কিন্তু ২১খন দেশত প্ৰতি একলাখ জনসংখ্যাৰ ৩০০ অতিৰিক্ত ৰোগী মৃত্যুমুখত পৰিছে বুলি সমীক্ষাত প্ৰকাশ পাইছে। দক্ষিণ এছিয়া, উত্তৰ আফ্ৰিকা,মধ্য প্ৰাচ্য আৰু পূৱ ইউৰোপৰ অঞ্চলসমূহত ক’ভিড-১৯ৰ ফলত হোৱা ৰোগীৰ সংখ্যা সৰ্বাধিক বুলি ওলাইছে। দেশ পৰ্যায়ত, ক’ভিড-১৯-ৰ ফলত সৰ্বাধিক সংখ্যক অতিৰিক্ত মৃত্যু হাৰ বিশ্বৰ ভিতৰত ভাৰততে বেছি। ইয়াৰ পাছতে আছে আমেৰিকা যুক্তৰাজ্য, ৰাছিয়া, মেক্সিকো,ব্ৰাজিল,ইন্দোনেছিয়া আৰু পাকিস্তান।