কংগ্ৰেছ এতিয়া কি চলিছে? বিধানসভাৰ অধিৱেশনৰ মাজতে দুই কংগ্ৰেছী বিধায়কৰ বাকযুদ্ধ!

ডিজিটেল ডেস্ক : সদনৰ মজিয়াতে দুই কংগ্ৰেছীৰ মাজত চলিল বাকযুদ্ধ৷ ৰাষ্ট্ৰীয় আৰু ৰাজ্যিক উভয় স্তৰতে কংগ্ৰেছ দলৰ অস্তিত্ব এতিয়া সংকটত৷ তাৰ মাজতে সদনৰ মজিয়াত কংগ্ৰেছী বিধায়কৰ মাজতে চলিল বাকযুদ্ধ৷ পঞ্জাব কংগ্ৰেছত ইতিমধ্যে দলৰ মাজতে হোৱা বহু সংঘাত, সমালোচনা তথা ক্ষমতাকেন্দ্ৰিক অঁৰিয়াঅৰিৰ পাছতে এইবাৰ অসম প্ৰদেশ কংগ্ৰেছৰ ৰাজনীতিত দেখিবলৈ পোৱা গ'ল তেনে এক পৰিস্থিতি৷ সদনৰ মজিয়াতে কংগ্ৰেছৰ দুই বিধায়কৰ মাজত হোৱা বাকযুদ্ধই দলটোৰ অভ্যন্তৰত চলি থকা অস্থিৰতা আৰু অনুশাসনহীনতাকে প্ৰতিফলিত কৰা বুলি চৰ্চা চলিছে৷

বিধানসভাৰ চলিত শীতকালীন অধিৱেশনৰ মাজতে কংগ্ৰেছৰ বকো সমষ্টিৰ বিধায়িকা নন্দিতা দাস আৰু ছয়গাঁও সমষ্টিৰ বিধায়ক ৰেকিবুদ্দিন আহমেদৰ মাজত অঁৰিয়াঅৰি লগা পৰিলক্ষিত হ’ল৷ উল্লেখ্য যে, গাৰো সম্প্ৰদায়ৰ ১৩গৰাকী শিক্ষাৰ্থী টেট উত্তীৰ্ণ হোৱাত বিষয়টো সদনৰ মজিয়াত ছয়গাঁৱৰ বুলি উত্থাপন কৰিছিল বিধায়ক ৰেকিবুদ্দিনে৷ ৰেকিবুদ্দিনৰ এই দাবীৰ বিপৰীতে সদনত থিয় হৈ বকোৰ বিধায়িকা নন্দিতা দাসে বিষয়টো তেওঁৰ সমষ্টিৰ অন্তর্গত বুলি সদৰি কৰে৷ শীতকালীন অধিৱেশনৰ মাজত কংগ্ৰেছ দলৰ দুই বিধায়কে এনেদৰে বাকযুদ্ধত লিপ্ত হোৱা এয়াই প্ৰথম৷

আনহাতে, ৰাজ্যত ইজনৰ পাছত সিজনকৈ কংগ্ৰেছী বিধায়ক বিজেপিমুখী হৈ বিৰোধী দলটোৰ ভেঁটি ইতিমধ্যে খহাইছে৷ মৰিয়নি সমষ্টিৰ বৰ্তমান বিজেপিৰ বিধায়ক ৰূপজ্যোতি কুৰ্মী, থাওৰাৰ সুশান্ত বৰগোহাঁইকে ধৰি একাধিক কংগ্ৰেছ বিধায়কে দল ত্যাগ কৰি শাসকীয় দলত যোগদান কৰিছে৷ অলপতে আকৌ বিধানসভা অধিৱেশনৰ প্ৰথমটো দিনতে ৰহাৰ কংগ্ৰেছ বিধায়ক শশীকান্ত দাসে মুখ্যমন্ত্ৰী ডঃ হিমন্ত বিশ্ব শৰ্মাৰ ভৰি চুই চৰকাৰৰ সহযোগিতাত সমষ্টি উন্নয়নৰ ইচ্ছা প্ৰকাশ কৰিছিল৷

৪জন কংগ্ৰেছী বিধায়কে শাসকীয় দলত যোগদানৰ ইচ্ছা

কংগ্ৰেছ দলত দুৰ্দিন অব্যাহত থকাৰ মাজতে এইদৰে সদনৰ মজিয়াতে বাকযুদ্ধত লিপ্ত হোৱাৰ পাছতে দলৰ মাজতে থকা মতভেদ স্পষ্ট হৈ পৰে৷ বিজেপিৰ বিধায়ক ৰূপজ্যোতি কুৰ্মীয়েও বুধবাৰে পুনৰ কংগ্ৰেছত খহনীয়া হোৱাৰ ইংগিত প্ৰদান কৰে৷ বিজেপিলৈ দুজন আৰু অগপলৈও দুজন কংগ্ৰেছৰ বিধায়ক যোৱাৰ পূৰ্ণ সম্ভাৱনাৰ কথা ব্যক্ত কৰে বিধায়কগৰাকীয়ে৷ এপ্ৰিলৰ ভিতৰতে সৰ্বমুঠ ৪জন কংগ্ৰেছৰ বিধায়কে শাসকীয় দলত যোগদানৰ ইচ্ছা প্ৰকাশ কৰাৰ পাছতে কংগ্ৰেছ দলৰ ভিতৰতচ’ৰাত এক অনাকাংক্ষিত দুৰ্যোগৰ হাতছানিৰ স্পষ্ট ইংগিত দিছে৷

যোৱা সপ্তাহত কংগ্ৰেছ দলে তেওঁলোকৰ বিধায়ক-নেতাসকলৰ বাবে আয়োজন কৰিছিল তিনিদিনীয়া বিশেষ প্ৰশিক্ষণ শিবিৰৰ। এই শিবিৰত দলটোৰ ৰাষ্ট্ৰীয় নেতৃত্বৰ অংশগ্ৰহণেৰে প্ৰশিক্ষণ প্ৰদান কৰা হৈছিল। কে চি বেণুগোপাল, পি চিদাম্বৰমৰ দৰে নেতা উপস্থিত হৈছিল এই শিবিৰত৷ প্ৰশিক্ষণ শিবিৰত কংগ্ৰেছৰ যুৱৰাজ ৰাহুল গান্ধীয়েও অনলাইনযোগে অংশগ্ৰহণ কৰিছিল। তাৰ পাছতো নিজৰ দলটোৰ প্ৰতি বিধায়কসকলৰ এই অনাস্থা কংগ্ৰেছৰ বাবে চিন্তাৰ কাৰণ হৈ পৰিব পাৰে।