কন্যাদান নহয় কন্যামান! বৈবাহিক ৰীতিৰ বিৰুদ্ধে কোন তাৰকা?

নতুন দিল্লীঃ হিন্দী চলচ্চিত্ৰ জগতৰ অন্যতম চৰ্চিত নাম আল্লু ওৰফে আলিয়া ভাট। এটি প্ৰাণবন্ত হাঁহিৰে জনপ্ৰিয় অভিনেত্ৰী আলিয়া ভাটে পুনৰ দৃষ্টি আকৰ্ষণ কৰিবলৈ সক্ষম হৈছে। নতুন বিজ্ঞাপনত আলিয়াৰ নতুন ৰূপ। বিজ্ঞাপনৰ জৰিয়তে সমাজলৈ যোগাত্মক বাৰ্তা প্ৰেৰণৰ চেষ্টা অভিনেত্ৰীগৰাকীৰ। ছোৱালী পণ্যসামগ্ৰী নহয়। বিয়াৰ ৰভাত কন্যাদান কৰাতো কোনোপধ্যে যুক্তিসংগত নহয়। বিগত কিছুদিনৰ পৰা এনে কেতবোৰ প্ৰসংগক কেন্দ্ৰ কৰি সমাজ তথা সামাজিক মাধ্যমত অব্যাহত আছে তুমুল চৰ্চাৰ। বিষয়টোক লৈ হঠাৎ সৰব হৈ পৰিছে বলীউড অভিনেত্ৰী আলিয়া ভাট। আলিয়াই কয় যে, ‘কন্যাদান নহয় কন্যামান!’ বিয়াৰ মণ্ডপত বহি থকা আলিয়াৰ মনত সহস্ত্ৰ প্ৰশ্নৰ অগাদেৱা। আলিয়াৰ প্ৰশ্ন, ‘ছোৱালীবোৰ পৰৰ সম্পত্তি নেকি?

ছোৱালীক তেওঁলোকে নিজৰ বুলি নাভাবে নেকি? এজনী ছোৱালীক সৰুৰে পৰা কিয় বাৰে বাৰে মনত পেলাই দিয়া হয় যে সৰু সুখৰ ঘৰখন চিৰদিনৰ বাবে তাইৰ নহয়? পিতৃ-মাতৃ আৰু পৰিয়ালে তেওঁলোকৰ ছোৱালী পৰৰ সম্পত্তি নহয় বুলি কিয় পতিয়ন নিয়াব নোৱাৰে। ছোৱালীবোৰ দানপাত্ৰৰ সামগ্ৰী নেকি?’ আলিয়াই উল্লেখ কৰাৰ লেখীয়া প্ৰতিগৰাকী ছোৱালীৰ মনৰ কোঠালিত এই ভাৱনাই ক্ৰিয়া কৰি থাকে। নতুন জীৱনৰ দুৱাৰডলিত পদাৰ্পন কৰাৰ পূৰ্বে হাজাৰ-বিজাৰ স্বপ্নৰ মাজেৰেই কিমান উজাগৰী প্ৰহৰ কটায় এজনী ছোৱালীয়ে সেয়া কল্পনাতীত। সেয়েহে কন্যাসন্তান দানপাত্ৰৰ সামগ্ৰী নহয় বৰঞ্চ ভালপোৱাৰ জৰিয়তে তেওঁলোকৰ মন পাব পাৰি। কন্যাদানক কেন্দ্ৰ কৰি প্ৰস্তুত কৰা আলিয়াৰ এই বিজ্ঞাপনটিয়ে সমাজত প্ৰচলিত নানান আশ্চৰ্যকৰ নিয়মৰ বিৰুদ্ধে আঙুলি তোলা কথাটো নুই কৰিব নোৱাৰি।