কৃষকৰ ভাৰত বন্ধ : ক'ত কেনেকুৱা প্ৰভাৱ ?

নতুন দিল্লী : বিতৰ্কিত তিনি কৃষি আইনৰ বিৰুদ্ধে দেশজুৰি অব্যাহত আছে কৃষক বিদ্ৰোহ। ইয়াৰ অংশ হিচাপে আজি দেশৰ কেইবাটাও কৃষক সংগঠনে ভাৰত বন্ধৰ আহ্বান জনাইছে৷ এই ভাৰত বন্ধৰ ফলত দিল্লীৰ যাতায়াতত ব্যাপক প্ৰভাৱ পৰাৰ লগতে উত্তৰ প্ৰদেশ, হাৰিয়ানাৰ উপৰি অসমতো ভাৰত বন্ধৰ প্ৰভাৱ পৰা পৰিলক্ষিত হৈছে৷

আজি পুৱা ৬বজাৰ পৰা বিয়লি ৪বজালৈ সংযুক্ত কিষাণ মৰ্চা চমুকৈ এছকেএমৰ নেতৃত্বত প্ৰায় ৪০টা কৃষক সংগঠনে এই প্ৰতিবাদী কাৰ্যসূচী গ্ৰহণ কৰিছে৷ দীৰ্ঘদিনে অব্যাহত থকা কৃষক বিদ্ৰোহে দেশৰ ৰাজনৈতিক পৰিস্থিতি অস্থিৰ কৰি ৰাখিছে। বহু সময়ত চৰকাৰৰ সৈতে আন্দোলনকাৰী কৃষকসলকল আলোচনালৈ আহিছিল যদিও সমগ্ৰ বিষয় অমীমাংসিত হৈ ৰৈছে৷ ইয়াৰ ফলতে আজি প্ৰতিবাদী কৃষকে ভাৰত বন্ধৰ আহ্বান জনাই অৱৰোধ কৰিলে ৰাজধানী দিল্লীৰ ৰাজপথ৷

এছকেএমে জনোৱা মতে দেশৰ সকলো চৰকাৰী আৰু ব্যক্তিগত কাৰ্যালয়, শিক্ষা তথা অন্যান্য ব্যৱসায়িক প্ৰতিষ্ঠান, উদ্যোগ আদি সকলো এই প্ৰতিবাদী কাৰ্যসূচীত বন্ধ আছে৷ প্ৰতিবাদকাৰী কৃষকে পঞ্জাৱ আৰু হাৰিয়ানাৰ সীমান্ত বন্ধ কৰাৰ উপৰি বহু স্থানত তীব্ৰ প্ৰতিবাদী কাৰ্যসূচী ৰূপায়ন কৰে৷ উল্লেখ্য যে বিতৰ্কিত তিনি কৃষি আইনৰ বিৰোধিতাৰে বিগত বৰ্ষৰ নৱেম্বৰ মাহৰ পৰাই দেশজুৰি চলিছে কৃষক বিদ্ৰোহ।