ক'ত আছে ইউক্ৰেইনৰ ৰাষ্ট্ৰপতি? ভিডিঅ' বাৰ্তাই বিপদহে চপাইছে নেকি জেলেনস্কিৰ?

ডিজিটেল ডেস্ক : ক'ত আছে ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কি? ৰাছিয়াই ইউক্ৰেইনৰ ৰাষ্ট্ৰপতিক হত্যা বা বন্দী কৰাৰ বাবে সৰ্বদিশৰ পৰা প্ৰচেষ্টা চলাই আছে বুলি অভিযোগ উত্থাপন হৈ আহিছে। এই আগ্ৰাসনৰ পৰা বাচিবলৈ ক'ত আত্মগোপন কৰি আছে ৰাষ্ট্ৰপতিগৰাকীয়ে৷ যুদ্ধৰ দাদামাৰ মাজতে ইটোৰ পাছত সিটো ভিডিঅ' বাৰ্তা প্ৰেৰণ কৰিছে ৰাষ্ট্ৰপতি জেলেনস্কিয়ে৷ কিন্তু এনে পৰিস্থিতিৰ মাজত ৰাষ্ট্ৰপতিগৰাকীৰ ভিডিঅ' বাৰ্তাই বিশ্বৰ অন্য ৰাষ্ট্ৰসমূহৰ তেওঁৰ প্ৰতি ধাৰণা সলনি কৰাতহে অৰিহণা যোগাব বুলি চৰ্চা চলিছে৷ সামৰিক যুদ্ধ আৰম্ভ হোৱাৰ পৰা এতিয়ালৈকে ছটাকৈ ভিডিঅ' বাৰ্তা প্ৰেৰণ কৰিছে ৰাষ্ট্ৰপতিগৰাকীয়ে৷ ইপিনে, শেহতীয়া তথ্য অনুসৰি পৰমাণু যুদ্ধৰ পৰা বাছিবলৈ ছাইবেৰিয়াৰ ভূগৰ্ভস্থ চহৰত পৰিয়ালসহ আত্মগোপন কৰিছে ৰাছিয়াৰ ৰাষ্ট্ৰপতি ভ্লাদিমীৰ পুটিনে৷ ৰাছিয়াৰ ৰাষ্ট্ৰপতি ভ্লডিমিৰ পুটিনে বৰ্তমানলৈকে কোনোধৰণৰ ভিডিঅ' বাৰ্তা প্ৰেৰণ কৰাৰ পৰা বিৰত আছে৷ সেই দৃষ্টিকোণৰ পৰা চাবলৈ গ’লে ইউক্ৰেইনৰ ৰাষ্ট্ৰপতিগৰাকীৰ এনে কাৰ্যকলাপে শত্ৰুৰাষ্ট্ৰ গোটোৱাতহে অৰিহনা যোগাইছে৷ ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিয়ে মঙলবাৰে ইউৰোপীয় সংসদক ষষ্ঠ দিনৰ বাবে সম্বোধন কৰে। ইউক্ৰেইনৰ সংসদৰ অধ্যক্ষ ৰুছলান ষ্টিফানচাক ডেলেভাৰ্ডৰ সৈতে জেলেনস্কিয়ে ইউৰোপীয় সংসদৰ অধিৱেশনত ভাষণ দিয়ে৷ আজি ইউৰোপীয় সংঘত ইউক্ৰেইনৰ ৰাষ্ট্ৰপতিয়ে দিয়া আৱেগবিহ্বল ভাষণে সকলোকে চিন্তিত কৰি তুলিছে৷ জেলেনস্কিৰ ভাষণৰ পাছতে অধিৱেশনত সকলোৰে পৰা উচ্চ প্ৰশংসা লাভ কৰে। ইউৰোপীয় সংঘলৈ (ইউৰোপীয় ইউনিয়ন) 'আপোনালোক আমাৰ সৈতে আছে বুলি প্ৰমাণ দিয়ক!' বুলি আহ্বান জনাইছে ইউক্ৰেইনৰ ৰাষ্ট্ৰপতিয়ে৷ ৰাছিয়াৰ সামৰিক আক্ৰমণ মঙলবাৰে ষষ্ঠ দিনত প্ৰৱেশ কৰে৷ তীব্ৰ বোমাবর্ষণে পুনৰ শংকিত কৰি তুলিছে ইউক্ৰেইবাসীক৷ পূব ইউৰোপীয় ৰাষ্ট্ৰখনৰ আটাইতকৈ বেছি প্ৰভাৱিত চহৰ খাৰকিভৰ প্ৰশাসনিক কাৰ্যালয়ত ৰাছিয়াৰ মিছাইলৰ দ্বাৰা আৱাসিক অট্টালিকাবোৰ লক্ষ্য কৰি লোৱাৰো অভিযোগ উঠিছে।