কুকুৰৰ সৈতে মহম্মদৰ কাৰ্টুন আঁকি বিতৰ্কত সোমাই পৰা লাৰ্ছ ভিল্কছৰ গাড়ী দুৰ্ঘটনাত মৃত্যু

ডিজিটেল ডেস্কঃ এক গাড়ী দুৰ্ঘটনাত মৃত্যুক সাৱটিলে ছুইডিছ শিল্পী লাৰ্ছ ভিল্কছে৷ লাৰ্ছ ভিল্কছ হল সেইজন শিল্পী যিয়ে ২০০৭ চনত কুকুৰৰ মৃতদেহৰ সৈতে পয়গম্বৰ মহম্মদৰ কাৰ্টুন অংকনৰ দ্বাৰা বিশ্বজুৰি বিতৰ্কৰ সৃষ্টি কৰিছিল৷ দক্ষিণৰ মাৰ্কাৰিড চহৰৰ ওচৰত এক গাড়ী দুৰ্ঘটনাত নিহত হয় ৭৫ বছৰীয়া লাৰ্ছ ভিল্কছ।

এই কাৰ্টুন প্ৰকাশ হোৱাৰ পাছৰে পৰা ভিল্কছৰ জীৱনৰ প্ৰতি সংশয় নামি আহিছিল৷ সেয়ে তেওঁ আৰক্ষী সুৰক্ষা আৱেষ্টনীত বাস কৰিছিল। কট্টৰ মুছলিম সংগঠনৰ দ্বাৰা তেওঁৰ ওপৰত ফটোৱা জাৰি কৰা হৈছিল আৰু তেওঁৰ ঘৰত বোমা বিস্ফোৰণ কৰা হৈছিল। লাৰ্ছ ভিল্কছে আৰক্ষীৰ বাহনত যাত্ৰা কৰা অৱস্থাত এখন ট্ৰাকৰ সৈতে সংঘৰ্ষ হয়।এই দুৰ্ঘটনাত দুজন আৰক্ষী বিষয়াও নিহত হৈছে।

উল্লেখ্য যে লাৰ্ছ ভিল্কছে তেওঁৰ কাৰ্টুনক লৈ বিশ্বজুৰি বিতৰ্ক সৃষ্টি হোৱাৰ পিছত কৈছিল যে এই কাৰ্টুনৰে মুছলমানসকলক উত্তেজিত কৰাৰ বাবে অংকন কৰা হোৱা নাছিল, কলাৰ মাধ্যমেৰে ৰাজনৈতিক বিতৰ্কক প্ৰত্যাহ্বান জনোৱাৰ হে ইয়াৰ মূল উদ্দেশ্যে আছিল৷ দুৰ্ঘটনা সংঘটিত হোৱাৰ পাছতে প্ৰথমে এইয়া এক হত্যাকাণ্ড বুলি সন্দেহ কৰা হৈছিল যদিও প্ৰাথমিক তদন্তত ইয়াৰ সম্ভাৱনা নাকচ কৰিচে ছুইডিচ আৰক্ষীয়ে।