কুকুৰৰ ভুকনিত অতিষ্ঠ হৈ ১৭ বছৰীয়া কিশোৰে হত্যা কৰিলে কুকুৰৰ গৰাকীক

ডিজিটেল ডেস্কঃ কুকুৰৰ ভুকভুকনিত অতিষ্ঠ হৈ এজন ১৭ বছৰীয়া কিশোৰে হত্যা কৰিলে কুকুৰটোৰ গৰাকীক। এই ঘটনা সংঘটিত হৈছে দিল্লীত। ৮৫ বছৰীয়া অশোক কুমাৰে তেওঁৰ পৰিয়ালৰ সৈতে দিল্লীৰ নাগলি ডেইৰী এলেকাত বাস কৰে। এজন ১৭ বছৰীয়া ল'ৰা আছিল অশোক কুমাৰৰ ওচৰ-চুবুৰীয়া। ল'ৰাজন যেতিয়া নিজৰ ঘৰলৈ আহি আছিল, সেই সময়ত অশোক কুমাৰৰ পোহনীয়া কুকুৰে তেওঁৰ ওপৰত ভুকিবলৈ আৰম্ভ কৰিছিল। এই কথাতে খং উঠি ল'ৰাজনে কুকুৰটোক ৰ'ডৰে আক্ৰমণ কৰে। অশোক কুমাৰে কুকুৰটোক বচাবলৈ ল'ৰাটোক বাধা দিবলৈ চেষ্টা কৰে। ইয়াৰ লগে লগে ল'ৰাজনে ৮৫ বছৰীয়া বৃদ্ধ অশোক কুমাৰক আক্ৰমণ কৰে। অশোক কুমাৰক আঘাতপ্ৰাপ্ত অৱস্থাত ওচৰৰ চিকিৎসালয়লৈ লৈ যোৱা হৈছিল যদিও চিকিৎসকে তেওঁক মৃত ঘোষণা কৰে। মৃত লোকজনৰ পত্নীৰ অভিযোগৰ ভিত্তিত কিশোৰ অভিযুক্তজনক আৰক্ষীয়ে গ্ৰেপ্তাৰ কৰি তেওঁক কিশোৰ ন্যায় পৰিষদৰ সন্মুখত হাজিৰ কৰাইছিল আৰু পাছত হত্যাকাৰী কিশোৰজনক কিশোৰ ঘৰলৈ প্ৰেৰণ কৰা হৈছিল। ঘটনাটোক লৈ সমগ্ৰ নাগলি ডেইৰী এলেকাত চাঞ্চল্য বিৰাজ কৰিছে। আৰু পঢ়কঃ Birthday Special Story: ‘ছিৰিয়েল কিছাৰ’ নাম পালেও বাস্তৱ জীৱনত সম্পূৰ্ণ ওলোটা ইমৰান হাছমী