‘লোকেল গ’জ গ্লোবেল’; ৪ হাজাৰ কোটি ডলাৰৰ সামগ্ৰী ৰপ্তানি ভাৰতৰ, মোদীৰ অভিনন্দন

ডিজিটেল ডেস্ক : আত্মনিৰ্ভৰ ভাৰতৰ যাত্ৰাত ভাৰতে এক বৃহৎ সাফল্য অৰ্জন কৰিবলৈ সক্ষম হৈছে। ভাৰতে থলুৱা সামগ্ৰীৰ ৰপ্তানিৰ দিশত লাভ কৰিছে অনন্য সফলতা। স্বয়ং প্ৰধানমন্ত্ৰী মোদীয়ে এই ঘোষণা কৰে আৰু ভাৰতৰ এই সাফল্যক ব্যাপকভাৱে প্ৰসংশা কৰে। ‘লোকেল গ’জ গ্লোবেল’; ৪ হাজাৰ কোটি ডলাৰৰ সামগ্ৰী ৰপ্তানি ভাৰতৰ, মোদীৰ অভিনন্দন প্ৰধানমন্ত্ৰীয়ে সদৰি কৰিছে যে, ৪০০ বিলিয়ন আমেৰিকান ডলাৰ অৰ্থাৎ চাৰি হাজাৰ কোটি ডলাৰৰ সামগ্ৰী ৰপ্তানিৰ লক্ষ্যত উপনীত হোৱাত ভাৰত সফল হৈছে। ভাৰতৰ আত্মনিৰ্ভশীলতাৰ যাত্ৰাৰ দিশত এটা এক মাইলৰ খুঁটি হিচাপে বিবেচিত হোৱা বুলি তেওঁ প্ৰকাশ কৰে। এটা টুইটত প্ৰধানমন্ত্ৰী মোদীয়ে লিখিছে, ভাৰতে ৪ হাজাৰ কোটিৰ সামগ্ৰী ৰপ্তানিৰ অভিলাষী লক্ষ্য গ্ৰহণ কৰিছিল। আৰু প্ৰথমবাৰলৈ সেই লক্ষ্যত উপনীত হ’বলৈ সক্ষম হৈছে। এই সফলতাৰ বাবে মই এমএছএমই, উৎপাদক, কৃষক, শিপিনীক অভিনন্দন জনাইছোঁ। আত্মনিৰ্ভৰ ভাৰতৰ যাত্ৰাৰ এয়া এক বৃহৎ সাফল্য। ‘লোকেল গ’জ গ্লোবেল’ হেজটেগো তেওঁ এই টুইটৰ সৈতে ব্যৱহাৰ কৰে। উল্লেখ্য যে, প্ৰধানমন্ত্ৰী মোদীয়ে টুইটটোত ভাৰতে ৰপ্তানিৰ ক্ষেত্ৰত লাভ কৰা এই সাফল্যৰ খতিয়ান হিচাপে ভালেমান গ্ৰাফিক্সো সংলগ্ন কৰি দিয়ে। প্ৰধানমন্ত্ৰী মোদীয়ে দেশৰ শাসনভাৰ গ্ৰহণ কৰাৰ পাছতে থলুৱা উৎপাদনৰ ওপৰত বিশেষ গুৰুত্ব আৰোপ কৰি আহিছিল। আত্মনিৰ্ভৰ ভাৰতৰ সংকল্প গ্ৰহণ কৰা মোদীয়ে ভোকেল ফল লোকেল শ্লোগানেৰেও দেশৰ থলুৱা উদ্যোগখণ্ডক অনুপ্ৰাণিত কৰাৰ চেষ্টা কৰি আহিছে।