ডিজিটেল ডেস্ক; ২০২৪ৰ লোকসভা নিৰ্বাচনৰ বাবে কঁকালত টঙালি বান্ধিছে বিজেপিয়ে৷ এতিয়াৰ পৰাই নিৰ্বাচনৰ বাবে সাজু হৈ উঠিছে দলটো৷ তাৰ মাজতে বিজেপিৰ ফালৰ পৰা ঘোষণা কৰা হৈছে যে নৰেন্দ্ৰ মোদীয়েই হ’ব আকৌ এবাৰ প্ৰধানমন্ত্ৰী পদৰ প্ৰাথী৷
কেন্দ্ৰীয় গৃহমন্ত্ৰী অমিত শ্বাহে কালি পাটনাত দুদিনীয়া যুটীয়া ৰাষ্ট্ৰীয় কাৰ্যনিৰ্বাহক সভাৰ সামৰণি অধিৱেশনত সভাপতিত্ব কৰিছিল। সভাত ভাষণ দি শ্বাহে কয়, বিজেপি-জেডিইউয়ে ২০২৪ চনত একেলগে নিৰ্বাচনত প্ৰতিদ্বন্দ্বিতা কৰিব আৰু নৰেন্দ্ৰ মোদী বিজেপিৰ প্ৰধানমন্ত্ৰী পদৰ প্ৰাৰ্থী হ’ব৷
কেন্দ্ৰীয় গৃহমন্ত্ৰীৰ ঘোষণাৰ পাছতেই যেন অন্ত পৰিল জল্পনা-কল্পনা৷ ২০২৪ চনৰ লোকসভা নিৰ্বাচনৰ বাবে প্ৰধানমন্ত্ৰী পদৰ প্ৰাৰ্থীৰ আলোচনা সদায়ে এক উৎকণ্ঠাৰ বিষয়। প্ৰায়ে প্ৰধানমন্ত্ৰী নৰেন্দ্ৰ মোদীৰ ৰাজনীতিৰ পৰা অৱসৰ আৰু নতুন মুখৰ ৰাজ অভিষেকক লৈ জল্পনা-কল্পনা চলি থাকে। তাৰ মাজতে কালি অমিত শ্বাহৰ ঘোষণাই ব্যাপক তাৎপৰ্য বহন কৰিছে৷
পাটনাত অনুষ্ঠিত বিজেপিৰ ইউনাইটেড ফ্ৰণ্ট নেচনেল ৱ’ৰ্কিং কমিটিৰ বৈঠকৰ সামৰণি অনুষ্ঠানত ভাষণ দি গৃহমন্ত্ৰী অমিত শ্বাহে ২০২৪চনত পুনৰ এবাৰ নৰেন্দ্ৰ মোদীক প্ৰধানমন্ত্ৰী হিচাপে ঘোষণা কৰাৰ সময়ত বিহাৰত জেডিইউৰ সৈতে দলটোৰ মিত্ৰতা সন্দৰ্ভতো আলোচনা কৰা হয়।
এই সন্দৰ্ভত তথ্য প্ৰদান কৰি বিজেপিৰ সাধাৰণ সম্পাদক অৰুণ সিঙে কয়, ২০২৪ চনৰ লোকসভা আৰু ২০২৫ চনৰ বিধানসভা নিৰ্বাচনত বিজেপি আৰু জেডিইউয়ে একেলগে যুঁজ দিব। এই বিষয়ে কোনো বিভ্ৰান্তি নাই। ২০২৪ চনৰ নিৰ্বাচন বিজেপিয়ে প্ৰধানমন্ত্ৰী নৰেন্দ্ৰ মোদীৰ নেতৃত্বত যুঁজিব, তেওঁ পুনৰ দেশৰ প্ৰধানমন্ত্ৰী হ’ব। আমি ২০২৪ চনৰ লগতে ২০২৫ চনত বিহাৰত একেলগে নিৰ্বাচনত যুঁজ দিয়াৰ সিদ্ধান্ত লৈছোঁ৷
বৈঠকত কাশ্মীৰৰ মহিলাসকলে প্ৰস্তুত কৰা ত্ৰিৰংগা সকলো সদস্যক বিতৰণ কৰা হয়। ইয়াৰ জৰিয়তে, এটা বাৰ্তা প্ৰেৰণ কৰাৰ চেষ্টা কৰা হৈছিল যে অনুচ্ছেদ ৩৭০ আঁতৰোৱাৰ পিছত, কাশ্মীৰৰ লোকসকলৰ চিন্তাধাৰা সলনি হৈছে।
Continue Reading
