ডিজিটেল ডেস্কঃ লুডু খেলা বাবেই এজন পিতৃয়ে কোবাই কোবাই হত্যা কৰিলে নিজ পুত্ৰক। উত্তৰ প্ৰদেশৰ আজমগড় জিলাৰ ৰৌনাপাৰ অঞ্চলত ৪ জুনৰ নিশা এজন লোকে নিজৰ একমাত্ৰ ৮ বছৰীয়া পুত্ৰক কোবাই কোবাই হত্যা কৰা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। ঘটনাটো সংঘটিত হোৱাৰ পাছত অভিযুক্তই ভাতৃৰ সৈতে মৃতদেহটো ঘৰৰ পৰা এক কিলোমিটাৰ দূৰত থকা পশ্চিম নৈৰ পাৰত পুতি থয়।
এই ঘটনা সন্দৰ্ভত তথ্য লাভ কৰাৰ পিছতে আৰক্ষীয়ে সেই স্থানত উপস্থিত হৈ অভিযুক্তক ঘটনা সন্দৰ্ভত সোধা-পোছা কৰে। আৰক্ষীয়ে বিষয়টো তদন্ত কৰি আছে। ৮ বছৰীয়া ধৰ্মবীৰ ওৰফে লাকী ৰৌনাপাৰ থানাৰ অন্তৰ্গত মহুলা গাৰ্ডেন গাঁৱত দ্বিতীয় শ্ৰেণীত পঢ়ি আছিল। ৪ জুন শনিবাৰে সন্ধিয়া ৫ বজাত ধৰ্মবীৰে ঘৰৰ ওচৰতে ছাগলী চৰাই মোবাইলত লুডু খেলি বহি আছিল। এই সময়ত পিতৃ জিতেন্দ্ৰই ধৰ্মবীৰক মোবাইলত লুডু খেলি থকা দেখি ক্ষুব্ধ হৈ পৰে। পত্নী ববিতাক পুত্ৰৰ কথা কৈ অভিযুক্তই ক্ষোভত শিশুটিক প্ৰহাৰ কৰিবলৈ আৰম্ভ কৰে।
অভিযুক্ত জিতেন্দ্ৰই শিশুটিক ইমান মাৰপিট কৰে যে নিশা ৯:৩০ বজাত শিশুটিৰ মৃত্যু হয়। ইয়াৰ পিছতে নিশা ৯:৩০ বজাত অভিযুক্তই নিজৰ ভাতৃ উপেন্দ্ৰ আৰু খুলশালীয়েক ৰাম জন্মৰ সৈতে শিশুটিৰ মৃতদেহ বস্তাত ভৰাই বাইকেৰে নদীৰ পাৰলৈ লৈ যায়। মৃতদেহটো নৈৰ পাৰৰ মাটিত তেওঁলোকে পুতি থয়। এই সন্দৰ্ভত এজন ব্যক্তিয়ে আৰক্ষীক ঘটনাটো অৱগত কৰে।
তথ্য লাভ কৰাৰ পিছতে আৰক্ষীয়ে তদন্ত আৰম্ভ কৰে। আৰক্ষীয়ে অভিযুক্ত পিতৃক আটক কৰি থানালৈ লৈ যায়। ইয়াৰ পিছতে পিতৃৰ তথ্য অনুসৰি আৰক্ষীয়ে সেই স্থানৰ পৰা মৃতদেহটো উদ্ধাৰ কৰে। আৰক্ষীয়ে শিশুটিৰ মাতৃ ববিতাক সোধা-পোছা কৰে। ববিতাই পুলিচক গোটেই কথাখিনি বিৱৰি কয়। এতিয়ালৈকে আৰক্ষীয়ে এই সন্দৰ্ভত কোনো আনুষ্ঠানিক বিবৃতি প্ৰকাশ কৰা নাই। আৰক্ষীয়ে গোচৰ ৰুজু কৰাৰ কথা জানিব পৰা গৈছে।
Continue Reading
