মাজনিশা ব্যায়াম কৰাত বাধা দিয়া বাবে মাতৃক ডাম্বেলেৰে কোবাই হত্যা কৰে পুত্ৰই

ডিজিটেল ডেস্কঃ পুত্ৰৰ হাতত প্ৰাণ হেৰুৱালে এগৰাকী মাতৃয়ে। হত্যাকাৰী পুত্ৰৰ নাম সুধীৰ কুমাৰ আৰু মৃত মাতৃৰ নাম পাপাম্মা বুলি জানিব পৰা গৈছে। পুত্ৰক ব্যায়াম কৰিবলৈ মানা কৰা বাবেই মাতৃক হত্যা কৰে পুত্ৰই। এই ভয়ংকৰ ঘটনা সংঘটিত হৈছে তেলেংগানাৰ হায়দৰাবাদৰ চুলতান বজাৰত। ২৪ জানুৱাৰীৰ মাজনিশা ২ বজাত সুধীৰ কুমাৰে ব্যায়াম কৰাত লাগে। সুধীৰ কুমাৰৰ বয়স ২৪। মাজনিশা পুত্ৰই ব্যায়াম কৰিবলৈ ধৰাত মাতৃ পাপাম্মাই বাধা দিয়ে।কয় যে এয়া ব্যায়াম কৰাৰ সময় নহয়, এয়া শোৱাৰহে সময়। মাতৃয়ে বাধা দিয়াত খং উঠি সুধীৰে মাতৃৰ মূৰত ডাম্বেলেৰে কোবাই হত্যা কৰে। মাতৃক বচাবলৈ চেষ্টা কৰে সুধীৰৰ ভগ্নী সুচিত্ৰাই। মাতৃক বচাবলৈ অহা সুচিত্ৰাকো আক্ৰমণ কৰে সুধীৰে। সুধীৰ মানসিকভাৱে অসুস্থ বুলি জানিব পৰা গৈছে। সুধীৰে স্নাতক ডিগ্ৰী সম্পূৰ্ণ কৰাৰ পিছত খাদ্য বিতৰণৰ এজেণ্ট হিচাপে কাম কৰিছিল। কিন্তু তেওঁ এবছৰ আগতে চাকৰিটো এৰিছিল আৰু ঘৰতে আছিল। মানসিকভাৱে অসুস্থ সুধীৰৰ এখন ব্যক্তিগত চিকিৎসালয়ত চিকিৎসা চলি আছিল। দেউতাকৰ মৃত্যুৰ পিছত তেওঁ যোৱা সাত বছৰ ধৰি মাক আৰু ভনীয়েকৰ সৈতে বাস কৰিছিল। সুধীৰক গ্ৰেপ্তাৰ কৰিছে আৰক্ষীয়ে। আৰক্ষীয়ে সদৰী কৰা অনুসৰি সুচিত্ৰা বৰ্তমান বিপদমুক্ত বুলি জানিব পৰা গৈছে। এই ঘটনাই সমগ্ৰ অঞ্চলতে তীব্ৰ চাঞ্চল্যৰ সৃষ্টি কৰিছে। আৰু পঢ়কঃ দেশৰ গৌৰৱ বিশেষভাৱে সক্ষম এটি কিশোৰ; স্বয়ম পাটিলে জিনিলে ‘প্ৰধানমন্ত্ৰী ৰাষ্ট্ৰীয় বাল পুৰস্কাৰ ২০২২’