মানৱ দেহত সংৰোপণ গাহৰিৰ কলিজা! ডাঃ ধনীৰাম বৰুৱাৰ সপোনক পূৰ্ণতা দিলে আমেৰিকাৰ চিকিৎসকে

ডিজিটেল ডেস্কঃ চিকিৎসা বিজ্ঞানৰ জগতে লাভ কৰিলে এক অভূতপূৰ্ব সাফল্য। প্ৰথমবাৰৰ বাবে ইতিহাস সৃষ্টি কৰি মানৱ দেহত সফলতাৰে সংৰোপণ কৰা হ’ল গাহৰিৰ কলিজা। আমেৰিকা যুক্তৰাষ্ট্ৰৰ চিকিৎসকসকলে মেৰিলেণ্ডত এজন ৰোগীৰ দেহত গাহৰিৰ কলিজা সংৰোপণ কৰাৰ পাছত ৫৭ বছৰীয়া ৰোগীজন আৰোগ্য হৈ উঠিছে। উল্লেখ্য যে ১৯৯৭ চনত অসসৰ বিশিষ্ট চিকিৎসক ডাঃ ধনীৰাম বৰুৱাই মানৱ দেহত গাহৰিৰ কলিজা সংৰোপণ কৰাৰ অভিযোগত ৪০দিন জে'ল খাটিব লগা হৈছিল। ডাঃ ধনীৰাম বৰুৱাক লৈ সেই সময়ত সৃষ্টি হৈছিল তীব্ৰ বিতৰ্কৰ। বৰ্তমান ধনীৰাম বৰুৱাৰ প্ৰচেষ্টাকে ২৫ বছৰৰ পিছত আমেৰিকাৰ চিকিৎসকে সফল কৰি তোলে। ডাঃ ধনীৰাম বৰুৱাৰ সপোন পূৰ্ণ হৈ উঠিল আমেৰিকাত।

ডাঃ ধনীৰাম বৰুৱাৰ মানৱ দেহত গাহৰিৰ কলিজা সংৰোপণৰ প্ৰচেষ্টা চলাই বিতৰ্কৰ সন্মুখীন হৈছিল যদিও এতিয়া তেওঁৰ সেই প্ৰচেষ্টাকে সফলতাৰে ৰূপায়ন কৰি ইতিহাস গঢ়িলে আমেৰিকাৰ চিকিৎসা বিজ্ঞানীয়ে। ইউনিভাৰ্ছিটি অফ মেৰিলেণ্ড মেডিকেল স্কুলৰ ফালৰ পৰা প্ৰকাশ কৰা অনুসৰি ডেভিড বেনেট নামৰ ৰোগীগৰাকী যোৱা কেইমাহ ধৰি শয্যাশায়ী হৈ পৰিছিল। এটা যন্ত্ৰৰ সহায়ত তেওঁৰ হৃৎপিণ্ড চলি আছিল। অৱশেষত তেওঁৰ স্বাস্থ্যৰ প্ৰতি লক্ষ্য ৰাখি গাহৰিৰ কলিজা সংৰোপণৰ সিদ্ধান্ত লয় চিকিৎসকে।

ডেভিড বেনেটে জীয়াই থকাৰ হেঁপাহত গাহৰিৰ কলিজা নিজৰ দেহত সংৰোপণ কৰিবলৈ প্ৰস্তুত হয়। সংৰোপণৰ পূৰ্বে গাহৰিৰ হৃৎপিণ্ডটো জিনগতভাৱে পৰিৱৰ্তন কৰা হৈছিল। বৰ্তমান ৰোগীগৰাকী সুস্থ হৈ উঠিছে আৰু চিকিৎসকসকলে তেওঁৰ নতুন অংগই কিধৰণে কাম কৰিছে তাৰ প্ৰতি তীক্ষ্ণ দৃষ্টি ৰাখিছে। মানৱ দেহত অংগৰ অভাৱ দূৰ কৰিবলৈ জন্তুৰ অংগ সংৰোপন কৰিব পৰা বিষয়টো এক মাইলৰ খুটি হৈ ৰব বুলি দাবী কৰিছে আমেৰিকাৰ চিকিৎসকসকলে।

আৰু পঢ়কঃ চাঞ্চল্যকৰ! পিষ্টলেৰে মূৰত গুলিয়াই আত্মহত্যা জ্যেষ্ঠ সাংবাদিক বিকাশ মৰাণৰ