মানৱ অধিকাৰ কৰ্মীক গ্ৰেপ্তাৰ: মুক্তিৰ দাবীৰে উত্তাল মণিপুৰ

ডিজিটেল ডেস্ক: পুনৰ উত্তপ্ত হৈছে মণিপুৰ৷ মণিপুৰৰ চুৰাচান্দপুৰত সংঘটিত হৈছে হিংসাত্মক ঘটনা৷ আনকি, হিংসাত্মক ঘটনাৰ পৰিপ্ৰেক্ষিতত প্ৰশাসনে ১৪৪ ধাৰা জাৰি কৰিবলৈ বাধ্য হৈছে৷ মণিপুৰৰ চুৰাচান্দপুৰত আজি বৃহৎসংখ্যক প্ৰতিবাদকাৰী ৰাজপথলৈ ওলাই আহিছিল আৰু আৰক্ষীৰ সৈতে সংঘৰ্ষত লিপ্ত হৈছিল৷ মণিপুৰস্থিত মানৱ অধিকাৰ কৰ্মী ড° মাৰ্ক থাংমাং হাওকিপক তাৎক্ষণিকভাৱে মুক্তি দিয়াৰ দাবীৰে ৰাজপথ কঁপাইছিল প্ৰতিবাদকাৰীসকলে৷ উল্লেখযোগ্য যে, মানৱ অধিকাৰ কৰ্মী ড° মাৰ্ক থাংমাং হাওকিপক মঙলবাৰে নতুন দিল্লীত গ্ৰেপ্তাৰ কৰা হৈছিল। 

মণিপুৰৰ চুৰাচান্দপুৰত প্ৰতিবাদকাৰীসকলে উপায়ুক্তৰ কাৰ্যালয়ৰ ফালে যাত্ৰা কৰাত নিৰাপত্তা বাহিনীয়ে বাধা আৰোপ কৰাত নিৰাপত্তা বাহিনীৰ ওপৰত শিলাবৰ্ষণ কৰিছিল প্ৰতিবাদকাৰীয়ে৷

 পৰিস্থিতি নিয়ন্ত্ৰণ কৰিবলৈ আৰক্ষীয়ে শূন্যলৈ গুলীচালনা কৰে। ইফালে, মণিপুৰৰ চুৰাচান্দপুৰ জিলাৰ আৰক্ষীয়ে জনোৱামতে, বৰ্তমান পৰিস্থিতি নিয়ন্ত্ৰণাধীন৷ 

আনহাতে, পৰিস্থিতিৰ অধিক অৱনতি ঘটাৰ আশংকাত মণিপুৰৰ চুৰাচান্দপুৰত ১৪৪ ধাৰা জাৰি কৰা হৈছে। ড° মাৰ্ক থাংমাং হাওকিপক মঙলবাৰে নতুন দিল্লীত গ্ৰেপ্তাৰ কৰা হৈছিল যেতিয়া তেওঁ তেওঁৰ বিৰুদ্ধে ৰুজু কৰা গোচৰৰ সন্দৰ্ভত আৰক্ষীয়ে তেওঁক জাৰি কৰা চমনৰ সঁহাৰি দিয়াত বিফল হৈছিল। 

আন্তৰ্জাতিক মানৱ অধিকাৰ সংস্থাৰ মণিপুৰ সমিতিৰ সভাপতি ড° মাৰ্ক থাংমাং হাওকিপক মঙলবাৰে আবেলি নতুন দিল্লীৰ কিষাণগড়ত থকা তেওঁৰ বাসগৃহৰ পৰা গ্ৰেপ্তাৰ কৰা হয়। 

মণিপুৰৰ চুৰাচান্দপুৰ জিলাৰ আৰক্ষীয়ে তেওঁৰ বিৰুদ্ধে আইপিচিৰ ধাৰা ১৫৩-এ/৫০৫(২)ৰ অধীনত এজাহাৰ দাখিল কৰে৷