ডিজিটেল ডেস্কঃকিছুদিন পূৰ্বে অসমত আৱিস্কৃত হোৱা মাইক্ৰিলেত্তা ঐশানী নামৰ ভেকুলীবিধে জীৱ বিজ্ঞানীসকলক নতুন গৱেষণাৰ সুযোগ দিছিল। দিল্লী বিশ্ববিদ্যালয়, ইণ্ডোনেচিয়ান ইনষ্টিটিউট অফ চাইন্সেছ আৰু ইউনিভাৰ্চিটি অফ টেক্সাছ আৰলিংটনৰ গৱেষকে দলে উত্তৰ পূৰ্বাঞ্চলৰ ৰাজ্য সমূহত বহু বছৰৰ পৰাই জীৱকুলৰ ওপৰত অধ্যয়ন চলাই গৈছে। তেনে অধ্যয়নত বহু নতুন নতুন জীৱৰ সন্ধান পোৱা গৈছে।
গৱেষকৰ দলটোৱে অসমৰ কাছাৰ জিলাৰ বনাঞ্চল আৰু ত্ৰিপুৰা তথা মণিপুৰত মাইক্ৰিলেত্তা ঐশানী নামৰ ভেকুলী বিধৰ সন্ধান লাভ কৰিছিল। শেহতীয়াকৈ দেহত ছয়টা ৰং থকা এক অতি ক্ষুদ্ৰাকৃতিৰ ভেকুলী শ্বিলঙত উদ্ধাৰ হৈছে ।
মেঘালয়ৰ পূব খাচী পাহাৰত আৱিষ্কাৰ হোৱা এই ভেকুলীবিধ অতি ক্ষুদ্ৰ আকৃতিৰ। ভেকুলীটোৰ আকাৰ ইমানেই সৰু যে ই আৰামেৰে মানুহৰ নখত বহিব পাৰে।
এই ভেকুলীটোৰ দেহত কমেও ছয়টা পৃথক ৰং আছে। ভাৰতীয় জুলজিকেল চাৰ্ভেৰ ভাস্কৰ শইকীয়া আৰু ইলোনা জে খাৰকংগোৰৰ নেতৃত্বত গৱেষকসকলে এই ভেকুলী বিধৰ সন্ধান লাভ কৰিবলৈ সক্ষম হৈছে।
ভেকুলীটোৱে "টিক-টিক" শব্দ কৰে আৰু ইয়াৰ নাম শ্বিলং বাছ ভেকুলী বুলি জনা যায়।
Continue Reading
