ডিজিটেল ডেস্ক: দেশত মহাৰাষ্ট্ৰ, আৰু ঝাৰখণ্ডৰ বিধানসভা নিৰ্বাচনলৈ আৰু মাজত মাথোঁ কেইটামান দিন বাকী আছে৷ তাৰমাজতে দিল্লী বিধানসভা নিৰ্বাচনৰ প্ৰস্তুতি তীব্ৰতৰ কৰি তুলিছে বিজেপি দলে। দিল্লীত বিজেপিয়ে নৱেম্বৰৰ শেষ সপ্তাহৰ পৰা ক্ষিপ্ৰতাৰে প্ৰচাৰৰ কাম কৰিব বুলি সদৰি কৰিছে। আৰু এসপ্তাহৰ ভিতৰত ৰাজ্যিক নিৰ্বাচনৰ পৰিচালনা সমিতি, প্ৰাৰ্থী বাছনি সমিতি আৰু ৰাজ্যিক মূল গোট গঠন কৰা হ’ব বুলিও সদৰি কৰিছে৷
দিল্লী বিধানসভা নিৰ্বাচনত বিজেপিয়ে শক্তিশালী আৰু ভাল ভাবমূৰ্তি থকা কাউন্সিলাৰক প্ৰক্ষেপ কৰিব বুলি জানিবলৈ দিছে। কলকাৰ যোগীতা সিং, বাবৰপুৰৰ পৰা মুকেশ বংশাল, মুণ্ডকাৰ গজেন্দ্ৰ দলালৰ দৰে শক্তিশালী কাউন্সিলাৰক বিধানসভা নিৰ্বাচনত টিকট প্ৰদান কৰাৰ সম্ভাৱনা প্ৰকট হৈ পৰিছে। এই লোকসভা নিৰ্বাচনত টিকট লাভ নকৰা দিল্লীৰ বহু প্ৰাক্তন সাংসদে নিৰ্বাচনত প্ৰতিদ্বন্দ্বিতা কৰিব বুলি সদৰি কৰিছে৷
প্ৰাপ্ত তথ্য অনুসৰি প্ৰাক্তন সাংসদ ৰমেশ বিধুৰী আৰু প্ৰবেশ ভাৰ্মাই বিধানসভা নিৰ্বাচনত প্ৰতিদ্বন্দ্বিতা কৰাটো নিশ্চিত বুলি প্ৰকাশ কৰাৰ লগতে বিজেপিয়ে দিল্লী বিধানসভাৰ ৩ খন আসন মিত্ৰজোঁটৰ দলসমূহক এৰি দিয়াৰ চিন্তা চৰ্চা চলাইছে।খবৰ অনুসৰি এন ডি এৰ মিত্ৰ দল জে ডি ইউক দিল্লীত দুখন আসন আৰু এল জে পি ক এখন আসন দিয়া হ’ব পাৰে বুলি বিশেষ সূত্ৰৰ পৰা জানিব পৰা গৈছে। দিল্লীৰ সীমাপুৰী, বুৰাৰী আৰু সংগম বিহাৰ বিধানসভাৰ আসন জেডিইউ আৰু এলজেপিৰ দৰে মিত্ৰজোঁট দলক দিয়াৰ সম্ভাৱনা আছে।
উল্লেখযোগ্য যে ২০২৫ চনৰ ২৩ ফেব্ৰুৱাৰীত সমাপ্ত হ’ব বৰ্তমানৰ দিল্লী বিধানসভাৰ কাৰ্যকাল। ইয়াৰ পূৰ্বে যিকোনো সময়তে নিৰ্বাচন অনুষ্ঠিত কৰিব পাৰিব।সম্প্ৰতি দিল্লীত আম আদমী পাৰ্টিৰ চৰকাৰ আছে। শেহতীয়াকৈ অৰবিন্দ কেজৰিৱালে দিল্লীৰ মুখ্যমন্ত্ৰীৰ পদৰ পৰা পদত্যাগ পদত্যাগ কৰাৰ পিছত আতিশি দিল্লীৰ মুখ্যমন্ত্ৰী পদত অধিষ্ঠিত হয়। দিল্লীৰ তৃতীয় মহিলা মুখ্যমন্ত্ৰী হিচাপে পৰিগণিত হয়৷
Continue Reading
