মহিলাৰ মায়াজালত চিকিৎসকৰ লটিঘটি! আৰক্ষীও হায়ৰাণ

ডিজিটেল ডেস্কঃ এগৰাকী চিকিৎসকৰ জীৱনলৈ নামি আহিছে বিপৰ্যয়৷ এগৰাকী মহিলাই নাকে-কাণে পানী খুৱাইছে চিকিৎসকগৰাকীক৷ উত্তৰ প্ৰদেশৰ কেলি হাস্পতালৰ জি ডি যাদৱ নামৰ চিকিৎসকগৰাকীৰ বিৰুদ্ধে আৰক্ষীক অভিযোগ দি মহিলাগৰাকীয়ে কয় 'মই জি ডি যাদৱৰ প্ৰেমিকা৷ মই ৫বছৰ ধৰি তেওঁৰ সৈতে বাস কৰি আছোঁ৷ কিন্তু আজিকালি জি ডি যাদৱে মোক প্ৰতাৰণা কৰিবলৈ ধৰিছে৷ মোৰ খোৱা-বোৱা বন্ধ কৰি দিছে৷ এটকাও নিদিয়া বাবে আজিকালি মই ৰাস্তাৰ কাষত পাচলি বেচিবলৈ বাধ্য হৈ পৰিছোঁ৷' চিকিৎসকজনে ফেচবুকত চিনাকি হৈছিল আৰক্ষীক অভিযোগ দিয়া মহিলাগৰাকীৰ সৈতে৷ মহিলাগৰাকী মিৰ্জাপুৰৰ৷ দুয়োৰে মাজত খুব সোনকালেই বন্ধুত্ব গঢ়ি উঠিছিল৷ লাহে লাহে দুয়ো দুয়োৰে প্ৰেমত পৰিল৷

জি ডি যাদৱে প্ৰথমবাৰৰ বাবে মহিলাগৰাকীক লগ কৰিবলৈ মিৰ্জাপুৰলৈ আহে৷ লগ পোৱাৰ পিছত দুয়োৰে হৃদয়ত প্ৰেম দুগুণে বৃদ্ধি পালে৷ প্ৰেমত ক'ব নোৱৰা হৈ মহিলাগৰাকীয়ে নিজৰ ঘৰ-বাৰী এৰি জি ডি যাদৱৰ সৈতে লগ পোৱাৰ প্ৰথম দিনাই কানপুৰলৈ গুচি আহে৷ কানপুৰত দুয়ো একেলগে এবছৰ কাল কটায়৷ ইয়াৰ পিছত জি ডি যাদৱ বস্তিলৈ বদলি হয় আৰু লগত মহিলাগৰাকীকো লৈ আহে৷ মেডিকেল কলেজৰ চৰকাৰী আৱাসত দুয়ো একেলগে থাকিবলৈ ল’লে৷ জি ডি যাদৱে মহিলাগৰাকীক বিয়া কৰাম বুলি কোৱাৰ লগতে এটা চাকৰি যোগাৰ কৰি দিম বুলিও কয়৷

সময় বাগৰি গৈ থাকিল৷ জি ডি যাদৱে মহিলাগৰাকীক না বিয়া পাতিলে না চাকৰি যোগাৰ কৰি দিলে৷ মহিলাগৰাকীয়ে আৰক্ষীক অভিযোগ দিয়া অনুসৰি তেওঁলোকৰ এটা সন্তানো আছে কিন্তু জি ডি যাদৱে সেয়া তেওঁৰ সন্তান বুলি স্বীকাৰ নকৰে৷ মহিলাগৰাকীয়ে চিকিৎসকজনক বিয়া পাতিবলৈ হেঁচা প্ৰদান কৰাত ওলোটাই তেওঁক মাৰপিট কৰিবলৈহে ধৰিলে৷ এদিন তেওঁ মহিলাগৰাকীক ঘৰৰ পৰা বাহিৰ কৰি দিয়াত উপায় নাপাই সন্তানটোৰ সৈতে মহিলাগৰাকীয়ে ওচৰৰ মানুহ এঘৰত আশ্ৰয় লয়৷ পেটৰ তাড়নাত এতিয়া তেওঁ সন্তানটোৰ সৈতে ৰাস্তাৰ কাষত পাচলি বিক্ৰী কৰিবলগীয়া হৈছে বুলি আৰক্ষীক জনায়৷

ইফালে চিকিৎসক জি ডি যাদৱে কয় যে, ''মই মহিলাগৰাকীৰ সৈতে ফেচবুকত চিনাকি হোৱাটো সঁচা৷ মহিলাগৰাকীয়ে মোক তেওঁ এলআইচিৰ এজেণ্ট বুলি কৈছিল আৰু মোৰ সৈতে কিছুমান বীমা পলিচিৰ বিষয়ে কথা পতিছিল৷ যেতিয়া তেওঁ মই চিকিৎসক বুলি গম পালে তেতিয়া তেওঁ তেওঁৰ মাতৃৰ চিকিৎসাৰ বাবে মোৰ ওচৰলৈ আহে৷ মহিলাগৰাকীয়ে মোক কৈছিল যে তেওঁ বহুত দুখীয়া৷ টকা-পইচাৰ নাটনি চলিয়েই থাকে৷ তেওঁ এনেদৰে কোৱাত মোৰ দুখ লাগে আৰু মই মোৰ ঘৰতে তেওঁক বনকৰা মহিলা হিচাপে ৰাখি থওঁ৷ মাহিলী মই তেওঁক ১৫-২০ হাজাৰ টকা দৰমহা দিওঁ৷ মহিলাগৰাকী আগৰে পৰা বিবাহিতা আৰু এটা সন্তানৰ মাতৃ৷ মোৰ ঘৰ কব্জা কৰাৰ মন তেওঁৰ৷ মই তেওঁৰ পৰিকল্পনা বুজি পোৱাত এতিয়া তেওঁ মোক ব্লেকমেইল কৰা আৰম্ভ কৰিছে৷ মোক যিকোনো কথাত ফচাম বুলি ধমকি দিয়ে৷ মোৰ জীৱনলৈ এতিয়া বিপদ নামি আহিছে৷

উত্তৰ প্ৰদেশ আৰক্ষীয়ে দুয়োৰে সম্পূৰ্ণ বিপৰীত ভাষ্য শুনি মূৰে-কপালে হাত দিবলগীয়া অৱস্থাৰ সৃষ্টি হৈছে৷ মহিলাগৰাকীয়ে দিয়া অভিযোগৰ ভিত্তিত আৰক্ষীয়ে তদন্ত প্ৰক্ৰিয়া আৰম্ভ কৰিছে৷ তদন্তত যি তথ্য পোহৰলৈ আহিব সেই তথ্যৰ ভিতৰতে উপযুক্ত ব্যৱস্থা গ্ৰহণ কৰা হ'ব বুলি জনায় ডিএছপি শক্তি সিঙে৷