‘মই ধৰ্ষণ কৰা নাছিলোঁ, মোৰ জীৱন ধ্বংস হৈ গ’ল’! ছুইচাইড নোট লিখি আত্মহত্যা প্ৰতিভাৱান খেলুৱৈৰ

আৰক্ষীয়ে যুৱ খেলুৱৈগৰাকীৰ আত্মহত্যাৰ খবৰ লাভৰ পাছতে ঘটনাস্থলীত উপস্থিত হৈ মৃতদেহ উদ্ধাৰ কৰে, লগতে উদ্ধাৰ কৰে ছুইচাইড নোটখন। তাত লিখা আছিল-‘মই ধৰ্ষণ কৰা নাছিলো’। ২৩ বছৰীয়া ৰাহুলে দেশৰ লগতে বিদেশতো দৌৰ প্ৰতিযোগিতাত অংশ গ্ৰহণ কৰি বহু সন্মান বুটলিবলৈ সক্ষম হৈছিল। সদ্যহতে দিল্লীত থাকি অলিম্পিকৰ বাবে প্ৰস্তুতি চলাই আছিল ৰাহুলে। সেই সময়তেই দিল্লীৰ এগৰাকী যুৱতীৰ পৰিয়ালে ৰাহুলৰ বিৰুদ্ধে পলুৱাই নিয়া আৰু ধৰ্ষণ কৰাৰ অভিযোগ উত্থাপন কৰিছিল। সেই অভিযোগৰ ভিত্তিত আৰক্ষীয়ে ৰাহুলক গ্ৰেপ্তাৰ কৰি ১৯ মাহ জে'লত ৰাখে। সদ্যহতে এমাহৰ জামিনত ঘৰলৈ আহিছিল ৰাহুল। মানসিকভাৱে তেওঁ বহুত ভাগি পৰিছিল আৰু শেষত গছৰ ডালত চিপ লৈ এই পৃথিৱীক বিদায় জনায়। 

ৰাহুলে ছুইচাইড নোটত লিখে যে ‘মই ধৰ্ষণ কৰা নাছিলোঁ। মোৰ গোটেই জীৱন ধ্বংস কৰি পেলালে। মোৰ ওপৰত ধৰ্ষণৰ মিছা গোচৰ তৰিছে। মই মানসিকভাৱে বহুত ভাগি পৰিছো। সেই যুৱতীগৰাকী কেৱল মোৰ বান্ধৱী আছিল। তাইহে মোক চাকৰি দিম বুলি মাতিছিল। ওলোটাই যুৱতীগৰাকীৰেই পিতৃ-মাতৃয়ে মোৰ ওপৰত মই অপহৰণ আৰু ধৰ্ষণ কৰা বুলি গোচৰ তৰিলে। ১৯ মাহ ধৰি জে’লত আছো, মোৰ গোটেই জীৱনেই শেষ হৈ গ’ল। মই আনকি এতিয়া একো কামো পাব নোৱাৰো। জে'ললৈ যোৱাৰ পিছত মই যথেষ্ট হতাশাত আছোঁ, সেয়েহে মই এই পদক্ষেপটো লৈছো। মই দুঃখিত। এইটো মোৰ পৰিয়ালৰ দোষ নহয়। মই যি কৰি আছো, নিজৰ ইচ্ছাৰে কৰিছো। কিন্তু ছোৱালীজনীৰ মাক দেউতাকক প্ৰশ্ন কৰিবই লাগিব। তেওঁলোকে মোক পইচাৰ লোভৰ বাবে বদনাম কৰিলে। দেউতা, অনুগ্ৰহ কৰি মোক ক্ষমা কৰি দিব। মোৰ সপোন আছিল এজন ডাঙৰ খেলুৱৈ হোৱা। মই কঠোৰ পৰিশ্ৰম কৰিছিলো, দেশ আৰু বিদেশত বহুতো পদক জিকিছিলো, কিন্তু মোৰ জীৱন ধ্বংস হৈ গ’ল। মই ধৰ্ষণ কৰা নাছিলো, তথাপিও মোক শাস্তি দিয়া হ’ল। মই এই কলংকৰ সৈতে জীয়াই থাকিব নোৱাৰো। সকলোৱে মোৰ বিষয়ে ভুল ভাবি আছে। মই কাৰো সৈতে কথা পাতিবলৈ যোগ্য হৈ থকা নাই। সেইকাৰণে মই মোৰ জীৱন শেষ কৰিছো। মই দুঃখিত, মই মোৰ পৰিয়ালক বহুত ভাল পাওঁ।”

আৰক্ষীয়ে ইতিমধ্যে গছত ওলমি থকা ৰাহুলৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰিছে। ৰাহুলৰ পিতৃয়ে কয় যে ছোৱালীজনীৰ পিতৃয়ে টকাৰ বাবে ব্লেকমেইল কৰি দহ লাখ টকা দাবী কৰিছিল। ৰাহুলৰ ছুইচাইড নোটত লিপিবদ্ধ কৰা অভিযোগসমূহৰ তদন্ত কৰি সেই অনুসৰি ব্যৱস্থা গ্ৰহণ কৰা হ’ব বুলি আৰক্ষী মুখপাত্ৰগৰাকীয়ে জানিবলৈ দিয়ে। যদিহে এয়া প্ৰকৃততে ধৰ্ষণৰ মিছা অভিযোগ তেন্তে ন্যায় পাবনে ৰাহুলে? সেয়াই এই মূহুৰ্তত লাখটকীয়া প্ৰশ্ন হৈ ধৰা দিছে সকলোৰে সন্মুখত।