ডিজিটেল ডেস্ক: ডিব্ৰুগড়ৰ লেপেটকটা চাহ বাগিচাত দুৰ্ঘটনাত পতিত হৈ গুৰুতৰভাৱে আহত মইনা নায়কৰ ঘটনাই উন্মোচন কৰিলে শোষিত ব্যৱস্থাৰ জীয়া ছবি৷ বুৰ্জোৱা সমাজ ব্যৱস্থাত আজিও মইনা নায়কৰ দৰে শ্ৰমিকে সৰ্বস্ব হেৰুৱাবলগীয়া হয় জীয়াই থকাৰ তাড়ণাত৷ সামাজিক মাধ্যমত হোৱা প্ৰতিবাদৰ অন্তত চৰকাৰে মইনা নায়কৰ চিকিৎসাৰ দায়িত্ব গ্ৰহণ কৰিলে। মইনা নায়কৰ বিষয়টোত সৰব হৈছে ৰাইজৰ দল৷
ৰাইজৰ দলে ছোৱালীজনীৰ চিকিৎসা দিল্লীৰ এইমছত কৰিবলৈ চৰকাৰক দাবী জনাইছে। মইনা নায়কৰ ঘটনাই কেইবাটাও তথ্য উন্মোচিত কৰিছে। ৰাইজৰ দলে আঙুলিয়াই দেখুৱাইছে তেনে কেতবোৰ তথ্য৷ স্বাধীনতাৰ ৭৫ বছৰৰ পাছতো অসমৰ শ্ৰমিকে সুৰক্ষা নোলোৱাকৈ কাম কৰি থাকিবলগীয়া হৈছে। যিসময়ত মূল্যবৃদ্ধিয়ে আকাশ চুইছে সেইসময়ত অসমৰ চাহ শ্ৰমিকসকলে মাত্ৰ ২০৫ টকা মজুৰিত বিপজ্জনকভাৱে কাম কৰিবলগীয়া হৈছে।
ৰাইজৰ দলৰ অভিযোগ- Factories Act, 1948 ৰ ২২ নং দফা অনুসৰি মেচিনৰ কাষত কেৱল প্ৰশিক্ষণপ্ৰাপ্ত প্ৰাপ্তবয়স্ক পুৰুষ শ্ৰমিকেহে কাম কৰিব পাৰে। তাৰ পিছতো আইন উলংঘা কৰি মইনা নায়কক মেচিনৰ ওচৰত কামত লগাইছিল।
অসমৰ এজন শ্ৰম মন্ত্ৰী, এটা বিয়াগোম শ্ৰম বিভাগ থকাৰ পিছতো উদ্যোগসমূহত মুকলিকৈ শ্ৰম আইনসমূহ উলংঘন হৈ থকাৰ অভিযোগ তুলিছে ৰাইজৰ দলে৷
এইসমূহ চূড়ান্ত বিফলতাৰ বাবে শ্ৰম মন্ত্ৰীয়ে পদত্যাগ কৰা উচিত নহয়নে বুলি প্ৰশ্ন তুলিছে দলটোৱে৷
Continue Reading
