মৰমৰ বোৱাৰী! বৰ পুত্ৰৰ মৃত্যু ঘটাত সৰু পুত্ৰৰ সৈতে বোৱাৰীৰ বিয়া পাতিলে শহুৰৰ ঘৰে

ডিজিটেল ডেস্কঃ কেতিয়াবা দেখা যায় স্বামীৰ মৃত্যুৰ পাছত পত্নীগৰাকীক স্বামীৰ পৰিয়ালে সেই মৃত্যুৰ বাবে জগৰীয়া কৰে বা স্বামীৰ মৃত্যুৰ পাছত শহুৰৰ পৰিয়ালত নানা হাৰাশাস্তিৰ সন্মুখীন হয় বোৱাৰীগৰাকী। সকলোৰে ক্ষেত্ৰত এনেকুৱা নহয় যদিও মাজে-সময়ে বিধৱা বোৱাৰীৰ দুৰ্বিষহ কাহিনী শুনিবলৈ পোৱা যায়। এনে এক ঘটনা পোহৰলৈ আহিছে য'ত স্বামীৰ মৃত্যুৰ পাছত বোৱাৰীগৰাকীক মৰমেৰে আৱৰি ৰাখিছিল শহুৰৰ পৰিয়ালে। বোৱাৰীগৰাকীৰ উকা জীৱন পুনৰ ৰঙীন কৰি তুলিবলৈ প্ৰচেষ্টা হাতত ল'লে শাহু আৰু শহুৰে। বোৱাৰীগৰাকীৰ নাম বন্দনা সিং। বিবাহৰ কেইমাহ মানৰ পাছতেই কম বয়সত স্বামীক হেৰুৱাইছিল বন্দনাই। স্বামীৰ মৃত্যুৰ পাছত বন্দনা দুখত ভাগি পৰিছিল। পুত্ৰক হেৰুৱাই পিতৃ-মাতৃও শোক সাগৰত ডুবিছিল যদিও বোৱাৰীয়ে যাতে কোনো কাৰণত মনোকষ্ট নাপায় তাৰ প্ৰতিও তেওঁলোকে খেয়াল ৰাখিছিল। পিতৃ-মাতৃহালে নিজৰ সৰু পুত্ৰ শুভম সিঙৰ সৈতে বন্দনাৰ বিয়া পাতি দিয়াৰ কথা ভাবে। এটা সময়ত যাতে বোৱাৰীগৰাকী অকলশৰীয়া নহয় তাৰ বাবে তেওঁলোকে বোৱাৰীৰ পুনৰ বিবাহ হোৱাতো বিচাৰে। অৱশেষত সকলোৰে সন্মতিত বন্দনা আৰু শুভমৰ বিয়াখন ধুমধামেৰে অনুষ্ঠিত হৈ যায়। বন্দনাই কয় যে, তেওঁৰ শহুৰৰ পৰিয়ালৰ প্ৰতিজন সদস্য অতি ভাল। ঘৰখনত সকলোৱে তেওঁক নিজৰ জীয়েকৰ দৰে বিবেচনা কৰে। এই ঘৰখনৰ পৰিৱেশ নিজৰ মাতৃগৃহতকৈও ভাল বুলি কয় বন্দনাই। তেওঁ লগতে কয় যে পুনৰ একেখন ঘৰকে শহুৰৰ পৰিয়াল হিচাপে পাই তেওঁ বহুত সুখী। দৰা শুভমে বিয়াখনৰ সন্দৰ্ভত কয় যে ''বন্দনাই মৰম আৰু সন্মানজনক আচৰণেৰে সকলোৰে হৃদয় জয় কৰিছিল। দাদাৰ মৃত্যুৰ পাছত তেওঁ বহুত দুখী আছিল যদিও পৰিয়ালৰ প্ৰতি তেওঁৰ দায়িত্ববোধ আৰু প্ৰেম হ্ৰাস হোৱা নাছিল। গতিকে পিতৃ-মাতৃৰ প্ৰস্তাৱক মানি লৈ মই বন্দনাক পত্নীৰ মৰ্যাদা প্ৰদান কৰিলোঁ।'' বন্দনা আৰু শুভমৰ বৈবাহিক জীৱন সুখৰ হ'বলৈ সকলো লোকই আশীৰ্বাদ দিছে আৰু শুভকামনা জ্ঞাপন কৰিছে। এই ঘটনা উত্তৰ প্ৰদেশৰ বান্দাৰ। আৰু পঢ়কঃ বলীউডৰ হিৰ’ৰো এনে ফিটনেছ নাই;যি ফিটনেছ আছে এই কেইগৰাকী আৰক্ষী বিষয়াৰ