ডিজিটেল ডেস্কঃ এক অতি কৰুণ ঘটনা সংঘটিত হৈছে। ৪ বছৰীয়া এজনী কণমানি ছোৱালীয়ে ৮ মহীয়া সৰু ভায়েকক পানী বুলি খুৱাই দিলে ডিজেল। যাৰ ফলত ৮ মহীয়া শিশুটোৱে কৰুণ মৃত্যুক সাবটি লয়। এই হৃদয়বিদাৰক ঘটনা সংঘটিত হৈছে নয়ডাত। ঘৰত উপস্থিত আছিল পৰিয়ালৰ সকলো সদস্য। ৪ বছৰীয়া বায়েকে ৮ মহীয়া ভায়েকৰ সৈতে খেলি আছিল।
হঠাতে ভায়েকে কন্দাত বায়েকে ওচৰতে পৰি থকা এটা বটল তুলি ভায়েকক পানী খুৱাবলৈ ধৰিলে। ছোৱালীজনীয়ে গম পোৱা নাছিল যে বটলটোত পানী নহয় ডিজেলহে আছে। ডিজেল খোৱাৰ লগে লগে শিশুটোৱে জোৰেৰে কান্দিবলৈ ধৰিলে। পৰিয়ালৰ সকলো সদস্যই শিশুটিৰ ওচৰলৈ দৌৰি আহিল। তেওঁলোকে গম পালে যে ছোৱালীজনীয়ে ভায়েকক পানীৰ সলনি ডিজেল খুৱাই দিলে। লগে লগে পৰিয়ালটোৱে শিশুটিক চিকিৎসালয়লৈ লৈ যায় যদিও তিনিদিন চিকিৎসাৰ অন্তত শিশুটিৰ মৃত্যু হয়।
ঘটনাটোৰ খবৰ পোৱা মাত্ৰকে আৰক্ষীৰ দল সেই স্থানত উপস্থিত হয়। আৰক্ষীৰ সোধা-পোছাৰ অন্তত জানিব পৰা গ’ল যে ৪ বছৰীয়া বায়েকে বটলত ৰখা ডিজেলক পানী বুলি ভুল কৰি ভায়েকক খাবলৈ দিছিল। বৰ্তমান শিশুটিৰ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে আৰু আৰক্ষীয়ে পৰৱৰ্তী তদন্ত কৰি আছে। ঘটনাটোৱে সমগ্ৰ অঞ্চলজুৰি গভীৰ শোকৰ ছাঁ পেলাইছে।
Continue Reading
