ডিজিটেল ডেস্কঃ এতিয়াও উত্তপ্ত হৈ আছে মণিপুৰ। ৩ মেৰ পৰা আৰম্ভ হোৱা বিদ্ৰোহৰ জুই এতিয়াও নুমুৱা নাই। মণিপুৰৰ ভিন্ন ঠাইত এতিয়াও অব্যাহত আছে হিংসাত্মক ঘটনা।
নিশা ইম্ফলত থকা কেন্দ্ৰীয় মন্ত্ৰী ৰাজকুমাৰ ৰঞ্জন সিঙৰ ঘৰত অগ্নিসংযোগ কৰে দুৰ্বৃত্তই। এই ঘটনাৰ সময়ত কেন্দ্ৰীয় মন্ত্ৰী ৰাজকুমাৰ ৰঞ্জন সিং ঘৰত নাছিল বুলি জানিব পৰা গৈছে।
ৰাজধানী ইম্ফলত বৃহস্পতিবাৰে সান্ধ্য আইন জাৰি কৰা হৈছিল যদিও প্ৰতিবাদকাৰীয়ে সান্ধ্য আইন ওফৰাই নিৰাপত্তাৰক্ষীৰ সৈতে সংঘৰ্ষত লিপ্ত হৈছে। দুৰ্বৃত্তই বহু ঘৰ জ্বলাই দিয়াৰ পাছত পৰিস্থিতি নিয়ন্ত্ৰণ কৰিবলৈ আৰক্ষীয়ে কন্দুৱা গেছ ব্যৱহাৰ কৰিবলগীয়া হয়।
আৰু পঢ়ক: মধ্যপ্ৰদেশত বিজেপিৰ গৰাখহনীয়াঃ ৪০০ বাহনৰ কনভয়-ছাইৰেন বজাই কংগ্ৰেছত যোগদান কৰিলে এইগৰাকী নেতাই
উল্লেখ্য যে কুকি-মেইটেই সংঘাতৰ বাবে মণিপুৰ অশান্ত হৈ পৰিছে। সংখ্যাগৰিষ্ঠ ‘মেইটেই’ জনগোষ্ঠীক অনুসূচিত জাতি হিচাপে স্বীকৃতি দিয়াৰ আন্দোলনে ক্ষুদ্ৰ ৰাজ্যখনৰ নগা-কুকি জনগোষ্ঠীৰ মাজত প্ৰতিক্ৰিয়াৰ সৃষ্টি কৰিছে। আৰু ইয়াক কেন্দ্ৰ কৰিয়েই ৰক্তাক্ত সংঘৰ্ষ, কাৰ্ফিউ, আৰক্ষীৰ গুলীচালনাৰ দৰে ঘটনা কেইসপ্তাহমানৰ পৰা সমগ্ৰ দেশে প্ৰত্যক্ষ কৰি আহিছে।
বুধবাৰে কাংপোকপি জিলাৰ খামেলোক গাঁৱত ভয়ংকৰ হিংসাৰ বলি হৈ নিহত হৈছিল ১১জন লোক। আহত হৈছিল ১৫ জনতকৈ অধিক লোক। এতিয়ালৈকে মণিপুৰ হিংসাত প্ৰায় ১০০জন লোক আৰু ৩১০ জনতকৈ অধিক লোক গুৰুতৰভাৱে আহত হৈছে।
