মণিপুৰৰ প্ৰসংগত ৰাজ্যসভাত প্ৰথমবাৰৰ বাবে মুখ খুলিলে প্ৰধানমন্ত্ৰী মোদীয়ে, কি ক’লে মোদীয়ে?

ডিজিটেল ডেস্কঃ মণিপুৰ বিষয়ত ইমান দিনে  মৌন হৈ আছিল প্ৰধানমন্ত্ৰী মোদী। দীৰ্ঘদিন ধৰি বিৰোধীয়ে প্ৰশ্ন উত্থাপন কৰি আহিছে মোদীৰ মৌনতাকলৈ। অৱশেষত প্ৰধানমন্ত্ৰীয়ে সংসদত উত্তৰ-পূবৰ ৰাজ্যখনৰ পৰিস্থিতিৰ বিষয়ে মুখ খুলিলে। ৰাজ্যসভাত মোদীয়ে কয় যে  মণিপুৰত শান্তি ঘূৰাই অনাৰ বাবে চৰকাৰে চেষ্টা চলাইছে । ইতিমধ্যে সংশ্লিষ্ট সকলো পক্ষৰ সৈতে আলোচনা কৰি ৰাজ্যখনলৈ শান্তি অনাৰ প্রক্রিয়া আৰম্ভ হৈছে বুলিও মোদীয়ে মন্তব্য কৰে। বুধবাৰে ৰাজ্যসভাত ৰাষ্ট্ৰপতিৰ ভাষণৰ ধন্যবাদসূচক  উত্তৰত প্ৰধানমন্ত্ৰীয়ে কয়, ‘মণিপুৰৰ পৰিস্থিতি স্বাভাৱিক কৰাৰ বাবে চৰকাৰে সকলো প্ৰচেষ্টা চলাইছে। এই পৰ্যন্ত এঘাৰ হাজাৰৰো অধিক এজাহাৰ দাখিল কৰা হৈছে। প্ৰায় ৫০০ লোকক গ্ৰেপ্তাৰ কৰা হৈছে। হিংসাৰ ঘটনা ক্ৰমাগতভাৱে হ্ৰাস পাইছে। ৰাজ্য আৰু কেন্দ্ৰীয় চৰকাৰৰ যৌথ প্ৰচেষ্টাত উত্তৰ-পূবৰ ৰাজ্য খনৰ অধিকাংশ অঞ্চললৈ শান্তি ঘূৰি আহিছে। স্কুল, কলেজ, কাৰ্যালয়ো মুকলি কৰা হৈছে।"