ডিজিটেল ডেস্কঃ ৰাজ্যৰ ভয়াৱহ বান পৰিস্থিতিৰ মাজতে মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত বুধবাৰে লোকসেৱা ভৱনত অসম চৰকাৰৰ এখন কেবিনেট বৈঠক অনুষ্ঠিত হয়। বৈঠকত ৰাজ্যৰ শেহতীয়া বান পৰিস্থিতিৰ বিষয়ে আলোচনা কৰা হয়। কেবিনেট বৈঠকত হোৱা আলোচনা অনুসৰি বৰ্তমানলৈ ২৮খন জিলা বানৰ কবলত পৰিছে। বিধ্বংসী বানৰ ফলত ৰাজ্যৰ ৮৪টা ৰাজহচক্ৰ ক্ষতিগ্ৰস্ত হৈছে। শেহতীয়া বানত ১১ লাখ ৩৪ হাজাৰ লোক ক্ষতিগ্ৰস্ত হৈছে।
মুখ্যমন্ত্ৰী শৰ্মাই সকলো জিলা আয়ুক্তক বানত আক্ৰান্ত লোকৰ ক্ষয়-ক্ষতিৰ বুজ ল’বলৈ নিৰ্দেশ দিয়ে। এইবাৰৰ বানত ৪০টা মথাউৰি ক্ষতিগ্ৰস্ত হৈছে। একেদৰে এতিয়ালৈ ৯২২ পথ, ৫২খন দলং ভাগিছে আৰু বানৰ ফলত ৩৮জন লোকৰ মৃত্যু হৈছে।
বান সাহায্যৰ বাবে প্ৰয়োজনীয় পুঁজি জিলা আয়ুক্তক মোকলাই দিয়া হৈছে বুলি কেবিনেট বৈঠকত উল্লেখ কৰা হয়। ১৫ আগষ্টৰ আগতে ক্ষতিগ্ৰস্তক চৰকাৰে সহায় কৰিব বুলিও সিদ্ধান্ত লোৱা হয়। কেবিনেটৰ সিদ্ধান্ত অনুসৰি কাইলৈৰ পৰা তিনিদিনৰ বাবে বানাক্ৰান্ত জিলাত বাহৰ পাতিব মন্ত্ৰীয়ে। অহা সপ্তাহত মন্ত্ৰীৰ দল বৰাকলৈও যাব বুলি সিদ্ধান্ত লোৱা হয়। কেবিনেটৰ সিদ্ধান্ত অনুসৰি মুখ্যমন্ত্ৰী নিজেও যাব ৰাইজৰ কাষলৈ।
Continue Reading
