ডিজিটেল ডেস্ক: মণিপুৰত সংঘটিত হৈছে ভয়াৱহ ভূমিস্খলন৷ মেগা ৰে’ল প্ৰকল্পস্থলীত বৃহৎ ভূমিস্খলনৰ ফলত ৭জন লোক নিহত হোৱাৰ লগতে ২৩জন লোক এতিয়াও সন্ধানহীন হৈ আছে৷ পশ্চিম মণিপুৰৰ নোনি জিলাৰ এখন চহৰত হোৱা বৃহৎ ভূমিস্খলনৰ ফলত কমেও সাতজন লোক নিহত আৰু ১৩ জন আহত হয়। ঘটনাটো কালি নিশা টুপুৰ য়াৰ্ড ৰে’ল নিৰ্মাণ শিবিৰত সংঘটিত হৈছিল।
ভূমিস্খলনৰ ফলত নদীৰ প্ৰবাহত বাধা আহি পৰাত বান্ধসদৃশ জলাশয়ৰ সৃষ্টি হৈছিল, যাৰ ফলত এতিয়া ধ্বংসাৱশেষ আঁতৰ কৰিলে বান হোৱাৰ সম্ভাৱনা প্ৰকট হৈ উঠিছে৷
সম্প্ৰতি ননি আৱাসীসকলক সাৱধানতা অৱলম্বন কৰিবলৈ আৰু শিশুসকলক নদীৰ ওচৰলৈ যাবলৈ নিদিবলৈ অনুৰোধ জনোৱা হৈছে৷ জিলা প্ৰশাসনে অনুসন্ধান, উদ্ধাৰ আৰু সাহায্য অভিযানৰ বাবে ৰাষ্ট্ৰীয় আৰু ৰাজ্যিক দুৰ্যোগ ব্যৱস্থাপনা সংস্থাসমূহৰ সৈতে যোগাযোগ কৰি আছে।
আৱাসীসকলক নিৰন্তৰ বৰষুণৰ বাবে সতৰ্ক হৈ থাকিবলৈ কোৱা হৈছে, যাৰ ফলত পৰিস্থিতি অধিক অৱনতি ঘটিব পাৰে।
মণিপুৰৰ মুখ্যমন্ত্ৰী এন বীৰেন সিঙে আজি টুপুলত ভূমিস্খলনৰ পৰিস্থিতি মূল্যায়ন কৰিবলৈ এখন জৰুৰী বৈঠক আহ্বান কৰিছে। অনুসন্ধান আৰু উদ্ধাৰ অভিযান ইতিমধ্যে চলি আছে।
বিগত কেইদিনমানধৰি ধাৰাসাৰ বৰষুণৰ মাজত ভূমিস্খলনৰ ফলত একাধিক বাধাৰ বাবে লোকসকলক এই অঞ্চলৰ মাজেৰে পাৰ হৈ যোৱা ৩৭নং ৰাষ্ট্ৰীয় ঘাইপথেৰে যাতায়াত পৰিহাৰ কৰিবলৈ কোৱা হৈছে।
কেন্দ্ৰীয় গৃহমন্ত্ৰী অমিত শ্বাহে মণিপুৰৰ মুখ্যমন্ত্ৰী এন বীৰেন সিং আৰু ৰে’ল মন্ত্ৰী অশ্বিনী বৈষ্ণৱৰ সৈতে ঘটনাটো সংক্ৰান্তত ইতিমধ্যে বুজ লোৱা বুলি জানিব পৰা গৈছে৷
শেহতীয়া খবৰ অনুসৰি, মণিপুৰৰ ননী জিলাৰ টুপুলত ভয়াৱহ ভূমিস্খলনত নিহত হৈছে অসমৰ শ্ৰমিক৷ অসমৰ মৰিগাঁও জিলাৰ লাহৰীঘাট সমষ্টিৰ কুশতলি অঞ্চলৰ ২৩জন শ্ৰমিক এই ভূমিস্খলনৰ কৱলত পৰিছে। ইয়াৰে এগৰাকী শ্ৰমিক নিহত, ৫গৰাকী চিকিৎসাধীন আৰু ১৭গৰাকী নিৰুদ্দেশ হৈ আছে। মৃত শ্ৰমিকজনৰ নাম গোপাল ফুকন (৩২) চিকিৎসাধীন অৱস্থাত মৃত্যু ঘটে। আন ১৭জন শ্ৰমিক এতিয়াও নিৰুদ্দেশ হৈ আছে। নিৰুদ্দেশ হৈ থকা শ্ৰমিক কেইজনৰ নাম হনুমান কোঁৱৰ, সোনান কোঁৱৰ, উৎপল ফুকন, মমীন ডেকা ৰজা, আকাশ লৰম, পল্লৱ লৰম, দেৱজিৎ ফুকন, বগীয়ান্ত ফুকন, ৰামু ফুকন (খুৰা গোসাঁইবড়ী গাঁও), জুনটি বৰদলৈ (কুশতলি), হৰমোহন ডেকা (লাউভূৰুংগা)।
আনহতে আঘাতপ্ৰাপ্ত হৈ চিকিৎসাধীন হৈ থকা শ্ৰমিক কেইজনৰ নাম প্ৰহ্লাদ বসুমতাৰী (কুশতলি), মণিৰাম ফুকন, ৰমেন ফুকন, মহেশ্বৰ ফুকন (খুৰা গোসাঁইবড়ী), জুন বসুমতাৰী(আমগুৰি)। আটাইকেইজন শ্ৰমিকৰ ঘৰৰ পৰিয়ালৰ লোক কান্দোনত ভাগি পৰিছে। আত্মীয়ই নিৰুদ্দিষ্ট শ্ৰমিককেইজনক উদ্ধাৰৰ কাৰণে অসমৰ মুখ্যমন্ত্রী হিমন্ত বিশ্ব শৰ্মাক অনুৰোধ জনাইছে।
Continue Reading
