মণিপুৰত আজি প্ৰথম পৰ্যায়ৰ ভোটগ্ৰহণ : মেৰীকমৰ স্বামীও নিৰ্দলীয় প্ৰাৰ্থী !

ডিজিটেল ডেস্ক : মণিপুৰ বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণ আজি পুৱা ৭ বজাৰ আৰম্ভ হয়৷ মণিপুৰ বিধানসভা নিৰ্বাচনৰ প্ৰথম পৰ্যায়ৰ আজি পাঁচখন জিলাত অনুষ্ঠিত হয়-ইম্ফল পূব, ইম্ফল পশ্চিম, বিষ্ণুপুৰ, চুৰাচান্দপুৰ আৰু কাংপোকপি। নিৰ্বাচনৰ ফলাফলসমূহ ১০ মাৰ্চত ঘোষণা কৰা হ'ব। ক'ভিড পজিটিভ আৰু কোৱাৰেন্টাইনত থকা ভোটাৰসকলক অন্তিম ঘণ্টাত তেওঁলোকৰ ভোটদান কৰাৰ অনুমতি দিয়া হয়। ৰাজ্যিক নিৰ্বাচন আয়োগৰ মতে ৩৮টা বিধানসভা সমষ্টিৰ বাবে মুঠ ১৭৩জন প্ৰাৰ্থী নিৰ্বাচনত অৱতীৰ্ণ হৈছে। মুঠ প্ৰাৰ্থীৰ ভিতৰত ১৫গৰাকী মহিলা আৰু ৩৯জন প্ৰাৰ্থীৰ বিৰুদ্ধে অপৰাধমূলক অভিযোগ আছে। ভাৰতীয় জনতা পাৰ্টীয়ে (বিজেপি) ৩৮জন, কংগ্ৰেছে ৩৫জন আৰু জনতা দল ইউনাইটেডে (জেডিইউ) ২৮জন প্ৰাৰ্থী প্ৰদান কৰিছে নিৰ্বাচনত। ইপিনে চামুলামলান গাঁৱৰ উপ-বিভাগীয় কাৰ্যালয় চৌহদত এছ বক্সাৰ মেৰীকমৰ স্বামী কাৰোং ওনখোলাৰে আজি ভোটদান কৰে। অনখোলাৰে ৰাজ্যখনৰ চুৰাচান্দপুৰ জিলাৰ চাইকোট (এছটি) বিধানসভা সমষ্টিৰ পৰা নিৰ্দলীয় প্ৰাৰ্থী হিচাপে বিধানসভা নিৰ্বাচনত প্ৰতিদ্বন্দ্বিতা কৰিছে। ওনখোলাৰে তেওঁৰ সমৰ্থকসকলৰ সৈতে পুৱা ৭ বজাত ভোটকেন্দ্ৰত উপস্থিত হৈছিল৷ কিন্তু ইভিএমৰ কিছু কাৰিকৰী বিজুতিৰ বাবে পলমকৈ ভোটগ্ৰহণ আৰম্ভ হোৱাৰ বাবে ভোটদান কৰিবলৈ প্ৰায় ৩০ মিনিট অপেক্ষা কৰিবলগা হয়। ভোটকেন্দ্ৰত ভোটদান কৰা তেওঁ প্ৰথমজন ভোটাৰ আছিল। ভোট দানৰ পিছত অনখোলাৰে ৰাইজক তেওঁলোকৰ ভোটাধিকাৰ সাব্যস্ত কৰিবলৈ আহ্বান জনাইছিল। অৱশ্যে মেৰীকমে নতুন দিল্লীত প্ৰশিক্ষণ লৈ থকাৰ বাবে ভোট দিবলৈ অহা নাই বুলি জানিবলৈ দিয়ে তেওঁৰ স্বামী কাৰোং ওনখোলাৰে৷