ডিজিটেল ডেস্ক: সমাগত ৰাষ্ট্ৰপতি নিৰ্বাচনৰ বাবে এন ডি এৰ প্ৰাৰ্থী দ্ৰৌপদী মুৰ্মুৱে আজি মনোনয়ন দাখিল কৰিছে। প্ৰাৰ্থী গৰাকীয়ে সংসদ ভৱনত ৰাজ্যসভাৰ মহাসচিবৰ কাৰ্যালয়ত আজি মনোনয়ন দাখিল কৰে। মনোনয়ন দাখিল পৰ্বত দ্ৰৌপদী মুৰ্মুৰ সৈতে প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং, বিজেপি সভাপতি জে পি নড্ডা আৰু বিজেপি শাসিত ৰাজ্যসমূহৰ কেইবাগৰাকীও মুখ্যমন্ত্ৰী উপস্থিত থাকে। অসমৰ মুখ্যমন্ত্ৰী হিমন্ত বিশ্ব শৰ্মা আৰু কেন্দ্ৰীয় মন্ত্ৰী সৰ্বানন্দ সোণোৱালেও মুৰ্মুক মনোনয়ন দাখিলৰ সময়ত সংগ দিয়ে।
উল্লেখ্য যে দেশৰ পৰৱৰ্তী ৰাষ্ট্ৰপতিৰ বাবে ১৮ জুলাইত নিৰ্বাচন অনুষ্ঠিত হ’ব। ৰামনাথ কোবিন্দৰ পাছত ভাৰতৰ ৰাষ্ট্ৰপতি পদত কোন অধিষ্ঠিত হ’ব, সেই লৈ চৰ্চা চলি থকাৰ মাজতে ২১ জুনত প্ৰধানমন্ত্ৰী নৰেন্দ্ৰ মোদীৰ সভাপতিত্বত বিজেপিৰ মুখ্য কাৰ্যালয়ত অনুষ্ঠিত দলৰ সংসদীয় কমিটিৰ বৈঠকৰ পিছত মুৰ্মুৰ নাম ঘোষণা কৰা হয়।
বিজেপিৰ ৰাষ্ট্ৰীয় সভাপতি জে পি নড্ডাই জানিবলৈ দিয়া অনুসৰি বৈঠকত ২০ গৰাকী লোকৰ নাম আলোচনা কৰাৰ পিছত সকলোৱে সৰ্বসন্মতিক্ৰমে জনজাতীয় মহিলা নেত্ৰী তথা ঝাৰখণ্ডৰ প্ৰাক্তন ৰাজ্যপাল দ্ৰৌপদী মুৰ্মুৰ নাম এন ডি এৰ ৰাষ্ট্ৰপতি পদৰ প্ৰাৰ্থী কৰাৰ সিদ্ধান্ত লৈছিল।
শাসকীয় পক্ষৰ এই সিদ্ধান্তৰ পূৰ্বে বিৰোধী দলসমূহে যশোৱন্ত সিনহাক বিৰোধীৰ উমৈহতীয়া প্ৰাৰ্থী হিচাপে ঘোষণা কৰিছিল। জানিব পৰা মতে যশোৱন্ত সিনহাই ২৭ জুনত মনোনয়ন দাখিল কৰিব। মনোনয়ন দাখিলৰ অন্তিম তাৰিখ হৈছে ২৯ জুন।
অৱশ্যে ভাৰতৰ ৰাষ্ট্ৰপতি নিৰ্বাচনলৈ লক্ষ্য কৰিলে দেখা যায় যে শাসকীয় পক্ষৰ দ্বাৰা প্ৰক্ষেপিত প্ৰাৰ্থী গৰাকীয়ে দেশৰ ৰাষ্ট্ৰপতি হিচাপে নিৰ্বাচিত হৈ আহিছে। গতিকে আগন্তুক ৰাষ্ট্ৰপতি নিৰ্বাচনত এন ডি এ- ৰ প্ৰাৰ্থী দ্ৰৌপদী মুৰ্মুৰ বিজয় প্ৰায় নিশ্চিত বুলি গণ্য কৰা হৈছে।
দেশৰ ১৫ সংখ্যক ৰাষ্ট্ৰপতি হিচাপে মনোনীত হ’বলৈ মাত্ৰ কেইখোজ দূৰত থকা মুৰ্মুৰ প্ৰতি এতিয়া নবীন পাটনায়ক আৰু জগন মোহন ৰেড্ডীয়েও সমৰ্থন আগবঢ়াইছে। এনে অৱস্থাত প্ৰতিভা পাটিলৰ পিছত দেশে দ্বিতীয়গৰাকী মহিলা ৰাষ্ট্ৰপতি লাভ কৰাটো প্ৰায় নিশ্চিত হৈ পৰিছে।
Continue Reading
