মোবাইল, ইণ্টাৰনেট সেৱাৰ পৰা আজিও বঞ্চিত ভাৰতৰ ২৫,০০০ গাঁও

ডিজিটেল ডেস্ক: ভাৰতৰ ২৫,০০০তকৈয়ো অধিক গাঁও এতিয়াও মোবাইল, ইণ্টাৰনেট সেৱাৰ পৰা বঞ্চিত হৈ আছে৷ লোকসভাত এই তথ্য সদৰী কৰিছে যোগাযোগ ৰাজ্যিক মন্ত্ৰী দেৱুসিংহ জেচিংভাই চৌহানে৷ দেশত মোবাইল বা ইণ্টাৰনেট সংযোগ অবিহনে বাঁওপন্থী উগ্ৰবাদৰ দ্বাৰা প্ৰভাৱিত কিমানখন গাঁও আছে সেই বিষয়ে লোকসভাৰ সাংসদ বেনি বেহানানে যোগাযোগ মন্ত্ৰালয়ৰ পৰা উত্তৰ বিচাৰিছিল৷ বেহানানৰ প্ৰশ্নৰ উত্তৰত ৰাজ্যিক মন্ত্ৰী চৌহানে কয় যে ভাৰত টেলিকম আৰু ব্ৰডবেণ্ডৰ বাবে অন্যতম বৃহৎ বজাৰ হ’ব পাৰে, কিন্তু এতিয়াও মোবাইল আৰু ইণ্টাৰনেট সেৱা উপলব্ধ নোহোৱা ২৫ হাজাৰৰো গাঁও আছে। অৱশ্যে, এই গাঁওবোৰত বাওঁপন্থী উগ্ৰবাদৰ দ্বাৰা প্ৰভাৱিত লোকসকলো অন্তৰ্ভুক্ত আছে।

শেহতীয়া এই তথ্যটো লোকসভাত চৰকাৰৰ উত্তৰৰ অংশ হিচাপেই আহিছে, য’ত কেন্দ্ৰই স্বীকাৰ কৰিছে যে টেলিকম সেৱা প্ৰদানকাৰীসকলে প্ৰদান কৰা তথ্য অনুসৰি, আনুমানিক ৫.৯৭ লাখ গাঁৱৰ ভিতৰত ২৫ হাজাৰ ৬৭খন গাঁৱত ইণ্টাৰনেট সেৱা উপলব্ধ নহয়। তদুপৰি, লোকসভাত চৰকাৰে দাখিল কৰা তথ্যত মোবাইল বা ইণ্টাৰনেট সেৱা উপলব্ধ নোহোৱা সৰ্বাধিক সংখ্যক উড়িষ্যাৰ ৬০৯৯ খন গাঁও, মধ্য প্ৰদেশৰ ২৬১২খন গাঁও আৰু মহাৰাষ্ট্ৰৰ ২৩২৮খন গাঁও অন্তৰ্ভুক্ত হৈছে৷ ক’ভিডসৃষ্ট পৰিস্থিতিৰ পাছত শিক্ষা ব্যৱস্থা আৰু দৈনন্দিন জীৱন পৰিক্ৰমাতত অনলাইন মাধ্যমৰ নৱতম সংযোজনৰ সময়ত ভাৰতৰ পঁচিশ সহস্ৰাধিক গাঁৱত মোবাইল আৰু ইণ্টাৰনেট উপলব্ধ নোহোৱা বিষয়টোৱে সামগ্ৰিকভাৱে অন্য এটা দিশ উন্মোচন কৰিছে৷